Sherwin Benshomin Windster a hui for di klinika na Hulanda

WILLEMSTAD /NIJMEGEN – Polis na Hulanda, ta den buskeda urgente di dos hòmber ku tin TBS i ku a huí for di Pompekliniek in Nijmegen. Un dje fugitivonan ta Sherwin Benshomin Windster (27). E otro hòmber ta Luciano Dijkman (24). E dos hòmbernan a hui djamars anochi den kareda di 20.30 for dje klinika na Nijmgen.
Segun informashon prosedente di Hulanda, deskonosinan a traha un buraku den kurá di e klinika forensiko-sikiatriko. Despues nan a hui den un Volkswagen Golf banku. Mesora un helikopter di polis a kuminsa ku e buskeda, pero te ainda no ta por a kaptura nan. Un tim di buskeda speshal di Polis,FastNL, ta trahando duru riba e investigashon.
Na 2019 a kondena Sherwin Benshomin Windster na 5 aña i 6 luna di kastigu di prison i TBS, pa entre otro un atrako armá, den kua kaso 1 dje viktimanan a fayesé.
Tur dos hòmber tin un postura normal.Windster ta 1.74 meter, e tin dos djente di oro i un tatoeage riba su pechu. Durante di su fuga, e tabatin un traningspak maron bisti.
Dijkman ta 1.83 meter altu i tabata bisti na un traningspak blou skur, riba e dia ku nan a huí.
Polis ta pidi hendenan na Hulanda pa tuma konta pa medio di e number di telefon gratis 0800-6070, si nan mira e dos hòmbernan aki..