Servisio Postal di Merka ta kontratando míles di hende durante e periodo di Pasku

PORTLAND – Louis DeJoy presidente di US Postal na Merka a konfirmá ku e pandemia di Covid-19 a pone ku e negoshi di servisio postal na Merka a lanta kabes formalmente atrobe.
No ménos ku algun aña atras gobiernu merikano mester a inyektá míles di miónes di pagadónan di belasting pa mantené US Postal habri pa evitá un kolapso den e empresa na nivel nashonal.
Pa awor segun Mark Dimondstein presidente di American Postal Workers Union ela keda sumamente impreshoná ku e bon trabou ku Louis DeJoy a bin ta hasi pa trese union bek den e empresa.
US Postals i otro empresanan priva na Merka manera Amazon, FEDEX i UPS ta hasiendo tremendo negoshi te ku a habri solisitut pa empleá míles di trahadó na nivel nashonal.
Mark Dimondstein a splika ku e kambionan ku Louis DeJoy a kuminsá hasi na momentu ku ela asumí e enkargo pa dirigí i struktura US Postal tabata ekselente.
Entrega di paketenan ta lokual ta negoshi awendia i US Postal tin sufisiente empresa importante ku nan ta afiliá na dje ku nan por sigi krese.
Louis DeJoy a indika ku US Postal tin aktualmente 200.000 trahadó i posiblemente pa otro aña esaki lo mester keda oumentá ku 40 mil trahadó mas.
Mark Dimondstein a bisa ku empleadonan di US Postals ta motivá ku e notisia aki i ta hasiendo tremendo trabou.
Ta antisipá ku durante luna di desèmber US Postals lo tin ku repartí entre 3.400 pa 3.600 mion pakete na empresanan i residensia na nivel nashonal na Merka.