Seri dokumental ku presunan riba sistema penitensiario

WILLEMSTAD. Djabierne proksimo diferente kanal publiko na Sint Maarten lo estrenán un seri di dokumental riba e sistema penitensiario na Sint Maarten komo un inisiativa pa deskurasha hubentut pa skohe mal kaminda den bida.
E seri yama HVB UNSCRIPTED i ta un inisiativa di minister di Hustisia Anna Richardson ku e meta ku nos a menshona aki riba.
E programa ta relata e historia kon presunan aktual i èks presunan a bira meramente un sifra mas den e sistema hudial kriminal di Sint Maarten.
HVB UNSCRIPTED lo ilustra i konsientisa kon eskohonan robes ta afektá tur hende den komunidat direkto i indirektamente.
E seri ta resultado di un esfuerso di Ministerio di Hustisia, Departamento di Asuntunan Hudisial i gerensia di prison Pointe Blanche.
Di akuerdo ku minister Richardson, su ministerio ta balorá e impakto di e eksperensianan personal di presunan i èks presu i e tabata buska un plataforma kaminda hubentut por skucha historia di esnan ku ta sintando kastigu largu den prison Pointe Blanche i di presunan ku ta den libertat kondishonal bou di vigilansia.
Den e dokumental, e ‘aktornan’ ku luho i detaye ta konta di nan pasado, bida familiar i desishonnan ku a pone ku nan ta presu.
Nan ta rekonose abiertamente ku nan desishonnan tabata robes pero si nan mester skohe entre e kaminda rekto i krimen, nan lo skohe pa kana e kaminda rekto i no bolbe komete un krimen.
E partisipantenan a konta di nan eksperensia ku nan a pasa den prison pa nan a sobrebibi den prison mientras ku eks presunan ku a sinta nan kastigu ta kon nan ta eksperensha nan libertat di un manera positivo.
Ministerio di Hustisia lo proporshona kopia dje dokumental na tur skol na Sint Maarten den un intento pa stimula hubentut pa tuma e desishonnan korekto i evitá di kai den e sistena hudis¡al i krimen.
Estreno dje seri lo ta djabierne awor na TelTV+, TV15, TVCARiB, pagina sosial di gobiernu riba FB i kanal di Youtube di gobiernu di Sint Maarten.
Tur luna lo tin un episodio nobo dje seri HVB UNSCRIPTED te desèmber.
E minister di Hustisia a gradisi tur e kolaboradornan i ‘aktornan’
ku a yega di kai será of ta será ainda.