Seramentu di refineria Isla ta un sla hopi duru pa e komunidat aki

WILLEMSTAD. Eksperto i konosedónan di e materia ta bisa ku no ta solamente aspektonan di medioambiente ta hunga un ròl krusial i e kambio pa energia mas limpi i ménos dañino pa naturalesa i medioambiente, sino tambe faktornan ku tin di haber ku geo-polítika, e influensia di Venezuela, China i Rusia un banda ku Merka i Ulanda e otro banda kendenan konsientemente ke wanta China i Rusia leu for di eksplotashon di petroli i gas den nos region.

Pero, kiko Kòrsou ta haña bèk?
Nada, pasobra nos no tin hendenan kapasitá i ku sufisiente kurashi pa deliberá i saka benefisio pa Kòrsou. Ku seramentu di e refineria, na Kòrsou nos a pèrdè kantidat di bon trahadó, ku lo no por keda remplasá fásilmente.
Nivel di bida a kai drástikamente i no ta presentá otro alternativa pa kompensá e pèrdida ku a sufri. Presensia di e refineria na Kòrsou i su operashon tabata nifiká un fuente di entrada sublime pa Kòrsou i e tabata duna trabou na míles di trahadó.
Ketu bai ta trata di tene e speransa bibu ku e refineria lo habri, miéntras dia, luna i añanan ta sigui pasa di manera ku e masa grandi di heru frus ta e úniko bèrdat ku nos ta kedando kuné. Hecho ta ku sumanan di mas ku miljartnan di dòler i florin ta rekerí pa e refineria por bolbe kuminsá funshoná. Nada konkreto no ta indiká ku esei lo sosodé.
Turismo ta e úniko sektor ku ta parsen fundeshi stabil i renobá.