SENDLEY OBISPO KONDENÁ NA 18 LUNA DI KUA 9 KONDISHONAL

WILELMSTAD – E siudadano Sendley Obispo a aparesé den sala di korte ayera akusá di vários delitu.
Pa kuminsá ta asina ku dia 21 di yüni 2022 el a basha bala riba un siudadano di fam Murillo pa kua akto el a keda akusá di intento di asesinato òf intento pa maltratá pisá ku un arma di kandela.
Ta lógiko ku Oispo tin kontra dje tambe e akusashon di poseshon di arma di kandela, pasobra a hañ’é ku un revòlver di plata, Smith & Wesson, kaliber 357 Special ku 15 patronchi.
Durante tratamentu di e kaso ayera den sala di korte a bini padilanti e hecho ku a surgi un diskushon ferfelu entre Sendley Obispo i un konosí di dje riba un outo segunda mano ku el a kumpra, pero ku tabatin algun defisiensia. Sendley Obispo kontinuamente tabata soportá tur sorto di atvertensia i krítika di su konosí relashoná ku defisiensianan di e outo segunda mano, te ku e atvertensianan aki a kuminsá molesti’é.
Sendley Obispo na sierto momento a rabia ku e konosí i asina ei dia 21 di yüni e situashon a eskala i e akusado Sendley Obispo a uza un arma di kandela ku segun su deklarashonnan ayera den sala di korte tabata únikamente pa spanta e konosí.
Den sala di korte ayera a bini padilanti tambe ku Sendley Obispo ta un adikto na droga, el a kuminsá uza base na un edat hopi yòn i e droga ei a surti su efektonan sumamente riba Sendley. Den sala di korte e konosí ku tabata presente a trese padilanti ku e lo no ke pa Sendley kai será, sino loke e mester ta tratamentu kontra di su adikshon na droga. Fiskal señora Ter Borg a repasá e dokumentonan ku ta relashoná ku e situashon personal di Sendley Obispo, kende a pasa den man di sikiater, sikólogo i Reklassering. E fiskal a demanda un kastigu di prizon di 28 luna di kua 6luna kondishonal, mas un periodo di prueba di 3 aña. Aktualmente e ta será den FoBa, pero segun ekspertonan preferiblemente mand’é Brasami.
E akusado Sendley a trese padilanti ku e ta kambiando su bida ya ku el a skohe e kaminda di Dios, e ta masha interesá den studia Beibel pa sigui palabranan di Dios.
Wes mr. J. Sntiker, skuchando tur loke a keda tresé padilanti, tantu di abogado mr. Koendjebiharie komo fiskal señora mr. Ter Borg, a konkluí ku un kastigu di prizon di 18 luna di kua 9 kondishonal ta sufisiente pa Sendley Obispo, pero e mester someté su mes na guia di Reclassering i aseptá guia i tratamentu di sikiater.