Semper nan a gust’é i stim’é na NY: “Didi” komo “Back-Up” den Yankees ??…

Deporte 5 Star ku ta sigui e tim di New York Yankees kasi 24/7, a tuma nota ku ta papiando pa trese Mariekson, “Didi” Gregorius bek komo un “back-up” den infield.
No ta probabel ku e YDK lo bai haña un chèns komo regular den niun ekipo.

I Yankees parse ta pensando den nan eks estrea pa regresá i fungi komo “back-up” di infield.
E hendenan di Yankees semper a demostrá apresio pa “Didi” ku tabata un hungadó stimá den “Club-House” i serka e fanatikonan eksigente di New York.
Yankees ta planiando pa usa sea Oswald Peraza o Anthony Volpe ariba, ambos ta nobato ku ta bon prospekto.
Segun esnan ku ta sigui e tim di New York Yankees di serka tambe, lo por tin algun moveshon den e tim pa buska un leftfielder, i tin hungadó ku lo por bai den kambio.

Didi Gregorius su presensia lo nifiká ku nan tin un bate “slengu” for di banki ku poder, un infielder ku por drenta hunga, i prinsipalmente un guia i lider den dug-out ya ku e la demostrá esei den un estadia den e tim di Bronx.