Selebrashon na Papiamentu na Tilburg

Djadumingu 26 di sèptèmber lo tin un Santu Sakrifisio di misa na Papiamentu na Petrus & Pauluskerk na Tilburg. E selebrashon ta kuminsá 15:00 i e adrès ta Vierwindenlaan 9. Despues di misa tin e oportunidat pa kumpra algun kos di boka dushi. Pastor Charles Eba’a lo presidí e selebrashon i kor God’s singing generation lo sòru pa animá e selebrashon ku kanto i músika. Pastor Charles Eba’a a nase na Sur-Kameroen i ta bibando den Brabant.

Temporada ku e tabata biba na Rotterdam e tabata hasi hopi selebrashon pa e komunidat Antiano na Hoogvliet. Pastor Charles Eba’s ta konosí ku e komunidat Antiano i tabata hopi biaha presente na retironan organisá dor di Antianonan na Hulanda. E ta un pastor yòn i ta di opinion ku Fe ta trese Felisidat bèrdadero. Kor God’s singing generation ta konsistí di un famia. Un famia ku a skohe pa laga Dios uza nan komo un instrumento. Un kor ku ta dediká na sirbi Dios.

Un i tur ta bon biní pa bin sera konosí ku pastor Charles i ku e famia di God’s singing generation. Komishon misa na Tilburg ta invitá tur fiel pa asistí. Lugá di parker ta grátis. Nos ta warda bo. Kòrda ku Papa Dios stima bo i nos tambe.