Selebrashon 137 aña Misa San Willibrordus, miéntras e Parokia ta kumpli 172 aña

Rev. Pastor Pedro i Pastor Israel i Konseho di Parokia di San Willibròrdus ta invitá bo na fiesta Patronal San Willibròrdus Djadumingu 7 di Novèmber 2021 pa 8:00or di mainta. E dia aki nos ta rekordá 172 aña di nos Parokia i 137 aña di nos edifisio di misa aktual. Misa di San Willibrordus ta e di 5 fundá riba Kòrsou dor di Mgr. Niewindt, situá den e área bunita di Bándabou. Un monumento di Dios históriko, kaminda fielnan grandi i chikí ta akudí pa alabá Dios na promé lugá i partisipá den diferente forma na aktividatnan ku ta yuda nan krese spiritualmente.
Djadumingu MAINTA: pa 08:00 Santa Eukarestia Misa Solèm ku kanto di Kor Hesus Dibino Niño di San Willibròrdus.

Ta un kustumber ku kada aña di nobo parokia ta skohe 2 baluarte di bario. E aña aki a skohe
1. Sra. Milangela Jonge, Kantante di Kor pa mas di 25 aña, i e último 8 añanan akí ta dirigente di e Kor Hesus Dibino Niño , i tambe ta dirigi e Kor di muchanan ku el a lanta Hesus Dibino Niño di parokia.
2. Sr. Carlos “Cayoochi” Schoot. Cayoochi ta oriundo di San Willibrordus, i e último añanan a duna un man tremendo na realisashon di diferente proyekto di nos parokia. Djadumingu nan lo risibí nan homenage meresí.

Un invitashon na un i tur pa kompañá e bario den e selebrashon aki djadumingu awor 7 di novèmber pa 08:00or di mainta ,Fiesta Patronal Parokia San Willibròrdus.

Parti atardi un i tur ta invitá den bario pa tuma parti na e aktividat den bario organisá pa sra Lydilia Tool van Uytrecht kaminda lo rekordá 172 aña di e parokia San Willibròrdus, kaminda famianan ta topa pa sinti e union i kalor di e bario.

Na nòmber di Parokia San Willibrordus
Pastor Pedro i Pastor Israel,