Segun resultado di outopsia: Ta indiká ku Jayland Walker a keda perforá ku por lo ménos 60 tiru di bala di 8 polis

OHIO – Kapitan Stephen Mylett hefe di kuerpo polisial na Akron, Ohio a konfirmá ku nan a risibí resultado di e outopsia di e hóben ku yama Jayland Walker (25) ku a keda mata despues di un persekushon polisial.
Lokual a pasa ta ku dia 27 di yüni polis tabata realisá un kontrol di tráfiko serka di konosido bario marginá ku e hendenan sa bende droga na Akron.
Aparentemente Jay Walker a nota ku tabatin kontrol polisial i aki ela hasi un Uturn ku su vehíkulo i trata na hui.
Den e kaso aki vários patruya a sali su tras den un persekushon i segun kapitan Stephen Mylett un tiru di bala a sali for di vehíkulo di Jayland Walker.
Na dado momentu Jayland Walker a baha for di su vehíkulo i trata na hui na pia i aki segun kapitan Stephen Mylett ela bolbe trata na tira riba polis.
Esaki tabatin komo konsekuensia ku agentenan polisial a sefta Jay Walker ku ráfaga di bala i ku naturalmente a fayesé.
Kapitan Stephen Mylett a bisa ku den e vehíkulo di Jayland Walker tabatin un arma di kandela i bastante munishon pero na momentu ku e tabata huyendo na pia e no tabatin arma huntu kuné.
Esaki ta kambia e senario por kompleto ya ku Jayland Walker no tabata arma ora ku e tabata huyendo i ku e arma ku e tabatin den su vehíkulo no a keda tira tampoko despues ku a hasi un investigashon polisial.
Kapitan Stephen Mylett a bisa ku un total di 8 agente polisial tabata involukrá den e insidente aki i ku tur ta bou di investigashon.