Segun Ministerio di defensa: 23 miembro di alto rango di kuerpo polisial na Colombia a renunsia

BOGOTA – Ministerio di Defensa a konfirmá ku e siman aki un total di 23 funshonario di kuerpo polisial na Colombia a entrega nan karta di retiru.
Ta trata aki di un total di 10 teniente koronèl i 13 kapitan ku a presentá nan karta di renunsia.
E motibu ta debí ku for di aña pasa Ministerio di Defensa na Colombia a kuminsá ku un investigashon kontra di e grupo di miembronan di alto mando polisial ku ta metí den aktividatnan ilisito.
Iván Velásquez Gómez minister di defensa Colombiano a manifestá ayera ku e ta na altura ku kuerpo polisial na Bogota, Cali i Medellin tin algun alto mando korupto i ta kontentu ku nan mes a disidí na entrega retiru pa asina Ministerio de Defensa por sigi ku nan investigashon.