Segun Josep Borrell: Putin mester para ku e gera pa evitá un kalamidat alimentario awor

MOSKU – Josep Borrel ku ta e alto representante di Union Europeo pa Asuntunan Eksterior a sigurá ku si presidente Vladimir Putin no para e gera awor lo bai tin un kalamidat alimentario i katástrofe di energia na nivel global.
Segun Josep Borrel pa mas ku tres luna kaba tin un oumento di preis di kombustibel na nivel global i no papia mes di e oumento di transporte di kònteinernan ku alimento aden.
Josep Borrel kier a manda un mensahe pa Vladimir Putin indikando ku su gera lo bai eksponé ku 1.200 mion persona lo bai keda seriamente afektá.
Ministernan (di eksterior) di paisnan di G20 durante nan último reunion ta konsentrando riba seguridat alimentario i energia.
Segun Josep Borrel e solushon mas fásil ta keda ku Vladimir Putin mester para e gera sin sentido aki pa mundu kompleto por bai den normalidat bek.