Segun Financial Times: Bankonan na Europa i Merka lo bai eliminá míles di kuponan di trabou

LONDRES – John Ridding CEO di e prestigioso korant finansiero ku yama “Financial Times” a publiká riba nan portal digital un artíkulo kaminda entidatnan finansiero na Europa i Merka lo bai kuminsá eliminá míles di kuponan di trabou.
E motibu dikon un kantidat Banko lo bai eliminá míles di hende for di trabou ta debí na e kolapso di ingreso di bankonan di invershon.
Na komienso di e aña aki vários banko di renombre manera Credit Suisse, Goldman Sachs, Morgan Stanley i Bank of New York Mellon a anunsiá ku lo bai eliminá míles kuponan di trabou.
Na komienso di e siman aki Goldman Sachs a anunsiá ku nan lo tin ku kita 6.5 % di nan personal for di trabou ku ta aproksimadamente 3.200 empleado.
Citigroup ku tin 240.000 trahadó tambe a anunsiá ku nan lo tin ku retirá 22 % di nan trahadónan.
Ta trata aki di un situashon serio ya ku si kita e profeshonalnan pèrdè trabou lo bai bira difísil pa haña trabou ya ku tin un kolapso den e mundu finansiero.
Bank of America ku tin 216.000 empleado na nivel mundial ta e úniko instituto finansiero ku so no a anunsiá ku lo no bai redusí su personal.