Segun datonan den veredikto di wes: 10% di poblashon di Kòrsou tin orientashon homoseksual

WILLEMSTAD. Den e veredikto ku wes mr. P. de Kort a dikta ayera riba e derecho di homoseksualnan pa forma pareha i/òf registrá komo tal, wes mr. P. de Kort a hasi menshon di hopi dato ku ta relativamente deskonosi pa públiko en general i tampoko ta sientifikamente investigá i probá.
E pareha ku a hiba gobièrnu korte a produsí dokumentashon kaminda nan ta kalkulá ku di 160.000 habitante di Kòrsou, 10% ta di orientashon homoseksual.
Gobièrnu riba e aseverashon aki na su turno a kontesta ku no tin sifra riba e materia aki i ku mester hasi investigashon ainda.
Pa wes De Kort e asuntu aki no tabata asina importante pa yega na su veredikto pasobra hecho ta ku un parti di poblashon di Kòrsou ta homoseksual.
Realidat di bida na Kòrsou ta ku relashonnan amoroso i konkubinato di partnernan dje mesun sekso ta un realidat sosial.
Segun e abogadonan di gobièrnu, si habri e posibilidat pa parehanan homoseksual kasa, esaki ta choka ku konvikshonnan religioso den nos pais.
Sinembargo e abogadonan di gobièrnu no por a respaldá e argumento ei ku dokumento.
Wèl tin un rapòrt di Buro Sentral di Estadistika ku abogadonan a referí na dje ku iglesianan ta okupá un posishon sosial importante den nos komunidat.
E dato aki ta basá riba un investigashon ku a hasi investigashon na 2015 i kaminda 35,5% di esnan entrevistá a informá ku tur siman nan ta bai sea nan misa katóliko, meskita, sinagoga òf tèmpel.
Komo 20% ta bishita nan lugá di orashon un biaha pa luna.
Sinembargo no por saka konklushon for di e sifranan aki ku si habri posibilidat pa parehanan homoseksual kasa òf registrá nan konkubinato, ku esaki ta kontra nan konseptonan religioso te pa nan bai kontra di konsepto di homoseksualnan k sí ke kasa.

GRADO DI ASEPTASHON
E mesun rapòrt di Buro di Estadistika riba hendenan homoseksual a investigá e grado di aseptashon di homoseksualidat i a puntra entre otro si nan lo tin algu kontra si nan tin bisiña homoseksual.
Nan ta klasifiká parehanan homoseksual meskos ku famianan grandi i 75% a manifestá ku nan lo no tin opheshon di tin parehanan asina komo bisiña.
Komo 20% sí lo ta kontra pa tin parehanan homoseksual komo bisiña i 5% no ta importá ni esun ni e otro. Komo 70% di esnan entrevista a kontesta ku nan ta di akuerdo pa trata hòmbernan homoseksual i muhénan lesbiana igual ku parehanan heteroseksual.
Un dje konklushonnan dje rapòrt ta ku no tin indikashon ku e aseptashon aki a baha for di 2015 bin ariba sino mas bien ku tin mas aseptashon pa parehanan asina.
Esei ta keda respaldá pa diferente desaroyo.