Segun análisis sosial ekonomiko: 9% di omzetbelasting riba wega di plaka digital por produsi 270.000.000 florin

WILLEMSTAD. Un análisis ku tin basta tempu den lachi serka ekspertonan di Konseho Sosial Ekonomiko ta indiká ku por saka 270 mion florin na Omzetbelasting for di sektor di casino. E análisis aki ta den lachi despues ku SER a analisá e pro i kontranan pa kobra Omzetbelasting riba wega di plaka den casino.
Si kobra Omzetbelasting riba wega di plaka on-line, e benefisionan ta mas grandi ainda pero ta enserá e risiko ku e sektor di wega di plaka on-line ta dal porta sera i bai hasi nan negoshi otro kaminda. No ku ta hasi diferensia pasobra awor aki e negoshi di wega di plaka digital ta krea gastu pa nos pais pero no ta haña entrada for di e sektor aki i asina 270 mion florin ta laba bai laman.
E proposishon aki no ta un invento sino un proposishon konkreto ku un frakshon den parlamento a hasi pa kobra 9% di Omzetbelasting riba wega di plaka digital. Pero promé ku tur kos mester kalkulá ki impakto un belasting lo kousa den sektor di wega di plaka digital.
Si e ta posibel pa kobra Omzetbelasting di 9% riba wega di plaka digital, por usa e plaka ku e ta produsi pa suavisá e peso di belasting i prima ku penshonadonan ta paga.
Di akuerdo ku e konsepto di inisiativa dje frakshon parlamentario ku a bai pa SER, nan ta asumi ku e sektor lo no reakshona (negativo) si e produsi 270 mion florin pa aña for di un volumen di 3000 mion florin na wega di plaka pa aña.
Sinembargo bida real ta diferente i mester ta masha kouteloso pa hasi kambio den un sektor kaminda por pèrde tur entrada komo resultado di un belasting eksagerá ku na su turno ta kousa pèrdida di kupo di trabou i ku e kompanianan ta muda nan sede pa otro pais ku lo risibi nan ku brasa habrí.
P’esei SER a rekomendá pa promé ku someté e inisiativa na diskushon pa konsulta ku e kompanianan ku ta aktivo den sektor di wega di plaka digital.
Seguidamente ta importante pa inventarisá kuantu aktividat i kompania tin den e sektor aki pasobra si manera nan ta splika, komo 40% di casinonan digital a regla un lisensia na Kòrsou.
Aki ta bira interesante pa haña sa dikon Kòrsou ta un teritoro interesante pa wega di plaka digital i ki efekto e Omzetbelasting di 9% lo tin riba nan negoshi.