Saserdotenan ta hasi e 7 promesanan akí riba dia di nan ordenashon

Philip Kosloski
Saserdotenan diosesano ta primintí ser sélibe, prediká e bèrdat i obedesé e obispu
Kontrali na saserdotenan ku ta miembronan di un komunidat religioso, saserdotenan diosesano no ta hasi votonan di kastidat, pobresa i obedensia. Sin embargo, nan ta hasi vários promesa riba e dia di nan ordenashon ku tin un alkanse similar:
1. Yuda ku e mishon di e obispu
Bo ta dispuesto na desempeñá semper e ministerio saserdotal ku e grado di presbítero, komo bon kolaborador di e Órden episkopal, alimentando e rebaño di Señor i laga bo ser guiá pa Spiritu Santu?
Obispunan ta e pastornan prinsipal di un region en partikular. Saserdotenan ta yamá na ser kolaboradornan, esta di yuda e obispu den su mishon pastoral.
2. prediká e bèrdat di e fe katóliko
Bo ta dispuesto na realisá e ministerio di e palabra, preparando e predikashi di e Evangelio i e eksposishon di e fe katóliko ku dedikashon i sabiduria?
Ta konfia na saserdotenan e tarea di prediká e fe katóliko na su rebaño, transmitiendo na dje e herensia di e Evangelio.
3. Selebrá liturgia ku reverensia
Bo ta dispuesto na presidí ku piedat i fielmente selebrashon di e misterionan di Kristu, espesialmente e sakrifisio di Eukaristia i e sakramento di Rekonsiliashon, pa alabansa di Dios i santifikashon di e pueblo kristian, segun tradishon di Iglesia?
Esaki ta un promesa pa kumpli ku e reglanan di Iglesia pa liturgia i selebrá esaki ku gran reverensia i rèspèt.
4. Mantené selibato
Bo ke dilanti Dios i dilanti Iglesia, komo signo di bo konsagrashon na Kristu, kumpli durante henter bida ku e selibato pa kousa di e Reino di shelu i pa Dios i pa hendenan?
E promesa akí ta bira realidat den e ordenashon diakonal di un saserdote, pero ta apliká esaki na resto di su bida komo saserdote.
5. Resa sin stòp
Bo ta dispuesto na invoká e miserikòrdia divino ku nos, na fabor di e pueblo ku kua bo a ser konfiá, perseverando den e mandato di resa sin pèrdè kurashi?
Esaki ta kòrda e saserdote riba su kompromiso ku orashon, menshonando pa promé be den su ordenashon diakonal, kaminda el a primintí di resa e Liturgia di Oranan diario.
6. Imitá Hesukristu
Bo ke uni bo mas kada dia mas na Kristu, sumo Saserdote, ku pa nos a ofresé su mes na Tata komo víktima santu, i kuné konsagrá bo mes na Dios, pa salbashon di hendenan?
Esaki ta un promesa importante, ku ta animá e saserdote na imitá Hesukristu i konsagrá na djE henter su bida.
7. Obedesé su Obispu
Bo ta primintí rèspèt i obedensia na e obispu diosesano i na bo superior legítimo?
Esaki ta e promesa final ku un saserdote ta hasi i ta hasié di manera mas solèm ku e otronan. E saserdote ta hinka rudia dilanti e obispu i ta pone su mannan entre e mannan di e obispu. E ta un rekordatorio físiko i un promesa di obedesé e obispu i su susesornan.