Santísima Trinidat

Promé Lektura : Deuteronomio 4, 32-34. 39-40
Salmo : Salmo 33, 4-5, 6, 9, 18-19, 20, 22
Di dos Lektura : Romanonan 8, 14-17
Evangelio : Mateo 28, 16-20

Un mucha tabata masha okupá ku su papel i pinturanan i su mama a puntr’é: Kiko bo ta pintando?
Mi ta pinta Dios, su yu a kontestá.
Pero bo no por pinta Dios. Ningun hende sa kon Dios ta.
Pronto boso lo sa, e mucha a kontestá. Ora ku mi kaba ku mi dibuho.
Algun be, nos tur a purba di pinta Dios ku dibuho, palabra, soño, imaginashon…
E Palabra di Dios ku nos ta proklamá ta un imáhen, un dibuho di Dios, un eko di Dios.
Fiesta di Santísima Trinidat ku awe nos ta selebrá ta fiesta di e misterio di Dios. E fiesta di e Dios semper mas grandi, di e Dios semper inkomprensibel, di e Dios ku ta UN den tres.
Un be un predikadó tabata papia di e Trinidat den frasenan mashá kompliká i un fiel a lanta i bisa: “ Pader, nos no ta komprondé nèt nada di loke bo ta bisa.”
No ta suponé ku boso ta komprendé. E ta un misterio, e saserdote a kontestá.
Sinembargo nos tur ke komprendé pa medio di un palabra, un dibuho, di un eko leu, sí …. sa algu di Dios.
San Pablo a bisa nos den e saludo inisial “ku e grasia di Señor Hesukristu, amor di Dios i komunion di Spiritu Santu sea ku boso”.
Den e saludo akí nos ta ser bendishoná pa Dios ku ta Un den Tres : Tata, Yu i Spiritu Santu.
Santísima Trinidat ta loke Dios ta den privá. Trinidat ta e bida sekreto di Dios.
Un pastor ta konta ku ora e ta keiru den kayanan di e parokia e ta mira bentananan será i e ta pensa riba e famianan ku ta biba tras di e glasnan. I e ta puntra su mes: Kon bida privá di e famia ei ta?
Tin amor entre esposonan i yunan? Tin komunikashon? Tin alegria?
Esaki ta nan bida sekreto kaminda mi no por drenta. Ningun hende sa kiko ta e loke ta pasa ei paden, si no t’asina ku e gritunan ta masha duru.
Bida di e Tata, di e Yu i di Spiritu Santu tin su sekretonan, su privasidat. Nos ta puntra nos mes, ken Dios ta? I nos ta kontestá bon ora nos definié komo Amor. Si E tabata un, kon lo E por a stima? Dios ta Tata, Yu i Spiritu Santu. E ta komunidat di amor i komunion di personanan den nan privasidat. Boso ta komprondé? Loke ta pasa drenta porta bai paden ta su bida, su misterio. I ainda nos no ta Dios pa penetrá den intimidat di hende i ménos den intimidat di Dios.
Nos ta konosé nos mes den e trato, den e akshon, den e enkuentro.
Mesun kos ta pasa ku Dios. Nos konosé Dios danki na su manifestashon, su salida, su enkuentronan ku su yunan, e hendenan.
Dios ta Tata den su kreashon maravioso, den su divino Providensia, den e solo ku ta bria pa esnan bon i esnan malu, den su amor na tur loke ta kreá i pa nos tur.
Hesus ta Dios den historia, den karni, den sufrimentu. Hesus ta Dios ku a bira imáhen visibel i palpabel, El a yora ku lágrima manera esnan di nos, El a stima ku un kurason manera esun di nos, el a traha ku man manera esnan di nos i a sufri ku un kurpa manera di nos. Hesus ta mas ku e potrèt di Dios, e ta presensia di Dios entre hende.
Spiritu Santu ta Dios guiando nos na fe, limpiando nos di piká, dunando nos plenitut i salbashon, e huéspet di kurason.
Nos konosé Dios pa su manifestashon, su salida i su enkuentronan ku su yunan, hendenan. Ora E sali di su kas i yega riba kaya ei nos ta kontra kuné i ta mir’é aktua. Tras di su bentana e ta misterio, esun privá, e Trinidat.
E promé milenio tabata milenio di e Tata. Tempu pa laga e múltiple diosnan i deskubrí eksistensia di un solo Dios.
E di dos milenio tabata e milenio di Hesukristu. Tempu di mishon i evangelisashon pa henter mundu.
E di tres milenio, resien estrená, mester ta di e Spiritu. Tempu di union entre nashonnan i di siña un solo lenga ku ta yuda nos pa superá divishon i konfrontashon.
Nos tur sa loke ta un tata: e ta engendrá yu, ta alimentá, ta protehá nan i ta eduká nan…
E ta esposo, trahadó i fanátiko di Numancia. E ta energia plamá den múltiple direkshon.
Dios ta únikamente Tata i ta usa su poder den engendrá yunan pa e Reino. E no ta reservá nada i ta proyektá su imáhen den su Yu: Hesukristu.
E Yu akí no tin plannan propio, ni karera ni famia pa kuida. Únikamente E ta Yu i su preokupashon ta Reino di e Tata, boluntat di e Tata i amor di e Tata. I amor di e Tata ta asina grandi ku e ta otro persona distinto: Spiritu Santu.
Esaki ta su bida privá, kada un ta definí su mes den su relashon ku otronan pero tur hende ta hasié den komunion.
Nos tambe ta relashoná ku Dios i ku otronan.
Kreá pa Dios Tata. Redimí pa Dios Yu. Santifiká pa Dios Spiritu Santu.
Un dia tabatin un pastor na aeropuerto di Barajas sperando pa subi oroplano i e hòmber sintá banda di dje a kuminsá ta duna opinion tokante religion. E tabata insistí ku e no ta aseptá nada ku e no por a komprondé.. Pader, el a bis’é, kiko ta e pantomina di e tres diosnan den un dios? Mi no ta kere esaki i ningun hende por a splikami, asina ta nunka lo mi kere tal kos.
Mustrando riba e solo ku tabata filtra dor di bentana, e saserdote a puntr’é: Abo ta kere den solo? Klaru ku sí, e inkrédulo a kontestá.
Masha bon, e saserdote a kontinuá, e rayonan ku a bo ta mira ta pasa den e bentana ei ta bini di e solo ku ta miónes di kilometer di aki. E kalor ku nos ta sinti tambe ta prosedé di e solo i di su rayonan. Algu asina ta pasa ku e Trinidat. Solo ta Dios Tata. Solo ta manda su rayonan pa nos, Dios Yu. Spiritu Santu ta prosedé di e Tata i e yu, esta … e kalor. Bo por splikami kon esaki ta sosodé?
E inkrédulo a kambia rumbo di e kombersashon.