“San Ramiro” lo hasi máksimo pa: Jong Holland i Jong Colombia haña nan sèn !!

E hende ku moda, no ta realisá semper ku esun den nesesidat ta deseá su plaka ora e ta traha, paso su sistema di biba hopi biaha ta “dal vla, saka vla”, o na ingles nan ta bisa,”Day to Day”.
Ta hasi 1 luna ku a hunga e gran final di nos futbol i te ku awe e timnan ku a hunga den e final di nos futbòl ku ta Jong Holland i Jong Colombia no a risibí nan reseta.
Esei naturalmente ta pone ku sigur e futbolistanan ta bira poko “nervioso” paso aña ta bai kaba, i nan ta mira moveshon ta sigui den futbòl, pero nada di nan plaka.
5 Star a komprondé ku e máksimo dirigente di nos futbòl Sr. Ramiro Griffith, alias “San Ramiro” a primintí di trata move shelu i tera den transkurso di awe pa mira ku lo por bin kla pa sèn subi kuenta di FFK pa Jong Holland i Jong Colombia risibí nan plaka.
Tabata “San Ramiro” mes ku a tuma kontakto ku un dirigente dje dos klupnan ku a hunga final pa asina informá ku e lo bai hasi lo máksimo e klupnan finalista haña nan plaka.
Sigur un dirigente a laga komprondé bon kla, ku 1 luna a bai i nada.
E no a gaña paso e ta den “kandela” i a papia di kurason.
Parse ku awe mainta 11or mester tin reunion ku banko.
Esun ku tin, di bèrdat hopi biaha no ta realisá ku esun ku tin mester, tin di haña e sèn ku a primintiele o debé….
Parse ku tin konfiansa den “San Ramiro” ku ta fresku’fresku for di Qatar kaminda e la bebe únikamente Budweiser “00”…