S. WINKLAAR SENTENSIÁ FUERA DI SU PRESENSIA

WILLEMSTAD. Un siudadano di fam Winklaar ayera mester a presentá den sala di korte debí ku el a purba importá 1685 gram di hashis. Tabata 10 di sèptèmber 2022 ku Winklaar a hasi su mes kulpabel na e akto kastigabel ariba menshoná.
Remarkabel ta ku su abogado mr. Roy Gonet so tabata presente, e akusado mes no tabat’ei. Serka hustisia e akusado a ninga di a purba pasa droga, siendo serka e abogado e akusado a atmití. E abogado a trese esaki padilanti durante tratamentu di e kaso, pero natural un opservashon asina ei no tin ningun balides, sigur ku e akusado mes no tabata presente. Abogado mr. Gonet a insistí ku su kliente a aseptá su kulpabilidat, pero wes J. Snitker a mustra abogado mr. Gonet ku su opservashonnan no tin ningun balides.
Fiskal señora mr. Hato Willems tambe a haña e opservashonnan di e abogado fuera di lugá, sigur pa e hecho ku e akusado mes no tabata presente pa konfirmá su kulpabilidat. E akusado a bisa ku el a bai hasi un fabor pa un hende, sin sa ku tabatin droga den e wega. Fiskal a keda masha asombrá ku un persona ku no konosé e akusado mes ta dun’é droga bai kuné. No ta kos ku sa pasa, pasobra droga ta representá plaka.
Ken ta bai duna un otro persona un kantidat di droga asina ei, sin ta sigurá di tin benefisio?
Fiskal a demandá un kastigu di prizon di 12 luna di kua 6 kondishonal. Wes mr. J. Snitker al final a imponé ku kastigu di prizon di 6 luna kondishonal pa Winklaar, teniendo kuenta ku e hecho ku aki ta trata di un firstoffender. Ta un kastigu tòg relativamente abou.