Ruta di Karnaval

Willemstad – Durante di e último simanan por a tuma nota ku e fenómeno “Kambio di ruta di karnaval” a bolbe lanta kabes. Informashon ku a yega serka direktiva di Asosiashon di Gruponan di Karnaval Kòrsou (AGKK) ta indiká ku e ministerio di VVRP probablemente lo bai hasi un kambio di ruta di karnval. Lamentablemente nos tin di bisa ku e ministerio di VVRP no a informá direktiva di AGKK pa loke ta trata e supuesto kambio di ruta aki, lokual nos ta konsidera komo un falta di rèspèt pa ku nos asosiashon i tur nos gruponan di karnaval. No por ta’sina ku desishonan rondo di selebrashon di karnaval ta keda tumá sin Asosiashon di Gruponan di Karnaval Kòrsou (AGKK) tin partisipashon.

Henter e asuntu di supuesto kambio di ruta di karnaval aki inesesariamente a kousa hopi frustrashon, rabiamentu i malkontentu serka lidernan di grupo di karnaval i tambe e pueblo karnavalista. Nos no ta komprondé kon por tin diskushon aña den aña afó riba ruta di karnaval.
Ta di lamentá ku e ministerio di VVRP no a hasi uso di e temporada di e pandemia di Covid-19 kual temporada niun aktividat no por a tuma lugá, pa dediká tempu pa solushoná e problematika aki. Ta laga awor ku nos ta praktikamente den full preparashon pa ku selebrashon di karnaval 2023 pa sali tuma desishon adhok. E ruta di karnaval aki entre tantu ta nifiká hopi pa historia di selebrashon di karnaval di Kòrsou, i nos ta dispuesto na konservá esaki.
Mester tene na kuenta ku e realidat, ku sin gruponan di karnaval no tin paradanan di karnaval. No por lanta di awe pa mañan hasi un kambio asina lagando e gruponan di karnaval un banda. Esaki ta inaseptabel.
Asosiashon di Gruponan di Karnaval Kòrsou (AGKK) mester haña oportunidat pa partisipá den tur e prosesonan di toma di desishon pa loke ta trata selebrashonn di karnaval. Nos ta rechasá e forma di falta di rèspèt ku pa años gobièrnu a bini ta atende ku gruponan di karnaval. E mes un sistema ku semper a apliká teniendo kuenta únikamente ku su propio interes. Hamas nos lo lubida kon gobièrnu a roba gruponan di karnaval su plaka di prekario i tambe supsidio. Nos lo tuma tuma un posishon fuerte kontra di e abusonan aki.