Rusia lo amplia edat pa drenta servisio militar te ku 30 aña

MOSKU – Serguéi Shoigú Minister enkargá ku e kartera di Defensa Ruso a proponé pa amplia edat pa drenta servisio militar te ku 30 aña i ayera esaki a keda aprobá
pa e gobiernu di Vladimir Putin.
Esaki ta nifiká ku tur suidadano Ruso hòmber of muhé ku tin entre 16 pa 30 aña di edat ku no ta traha of bai skol i ku pasa inspekshon médiko ta obligá pa drenta den servisio militar.
E motibu dikon Ministerio di Defensa a kambia e edat ta pa rekluta mas tantu militar posibel i esaki ta debí ku durante e invashon na Ukrania hopi di nan militarnan a muri den kampo di bataya.
Lokual ku tin aworakí ta ku hopi mayor ta bandonando Rusia ku nan yunan pa asina evitá ku nan ta keda rekluta pa drenta servisio militar.
Mayoria biaha e hóbennan aki ta bira víktima debí ku nan no tin ningun klase di eksperensia den kampo di bataya.
Vladimir Putin kier yega na 1.5 mion militar i esaki ta posibel solamente si subi edat di atmishon den ehérsito.