Rusia a kòrta suministro di gas di Nord Stream 1 pa ku parti sentral di Europa

MOSKU – Tin un situashon bastante serio na kaminda entre Rusia i paisnan ku nan tabata suministrá gas serka
di e kompania Gazprom durante dékadanan.
Alexei Miller presidente di Gazprom a konfirmá ayera ku e servisio di suministro di gas lo para temporalmente debí ku tin problema ku e sistema turbina ku ta konektá ku e tuberíanan.
Tin spekulashon ku no tin ningun problema ku e sistema i ku awor Vladimir Putin a kuminsá buta preshon di e forma aki riba paisnan den Union Europeo pa kita sanshonnan ku tin riba e pais.
Na mes momentu Dimitri Medvedev hefe di Konseho di Seguridat Nashonal na Rusia a menasa un dia promé ku debí ku paisnan den Union Europeo a partisipá den e sanshonnan kontra Rusia lo bai laga nan sin gas.
Dimitri Medvedev a rekomendá Ursula Von der Leyen presidente di Komishon Europeo pa kuminsá deliberá ku su sosionan pa kita tur sanshon kontra Rusia sino e periodo largu di friu ku ta na kaminda lo bira un pesadia pa nan.