Ruisandro Cijntje ta e kantidato pa minister di ekonomia di Partido Nashonal di Pueblo

WILLEMSTAD. Den un sala yen ayera nochi na Kas di Pueblo, mayoria di miebronan a vota pa Ruisandro Cijntje bira e próksimo minister di ekonomia pa Partido Nashonal di Pueblo.
E ambiente tabata kayente pero sano.

Diskushon bai bin i tur hende a duna nan aporte.
Direktiva a duna espasio amplio pa tur hende por a trese nan opinion dilanti demokrátikamente manera ta kustumber di Partido Nashonal di Pueblo.
No tabata fasil, ya ku tabatin hopi opinion pero finalmente a bin sali Ruisandro komo e kantidato ku mas voto.
Sr. Sosa tabata e otro kantidato.
E resultado a bira konosi algu prome ku 10or di anochi.

Sala a aploudi Sr. Sosa na momentu ku ela hiba palabra despues di votashon i ela trese dilanti: “Mi ta sostene Sr. Cijntje i pabien yave”.
Despues a hiba palabra Ruisandro ku a gradisi sala pa e sosten risibi. Ruisandro Cijntje a bisa ku e sa di e trabou pisá ku ta spere ora ku e bira minister i ela agregá ku “Mi ta bai pe, Ku esfuerso den tim nos ta gana e bataya aki”.
Sra. Lider Mimi Larmonie-Cecilia komo lider a gradisi tur ku tabata presente i rekordá tur hende ku dia 29 di Juli 2021, e proseso lo sigui ku proposishon di sr. Cijntje komo kandidato pa e kartera di Ekonomia den un reunion general.
Eynan lo ratifiká e desishon tuma ayera nochi pa Konseho di Partido (Partijraad).