Rudy Giuliani i otro 4 aliado di Trump: Tin ku testiguá den Kongreso pa kaso di asalto na Kapitolio

WASHINGTON – Un komité di Kongreso ku ta investigando e asalto na Kapitolio di dia 6 di yanüari di 2021 a sita kuater aliado di eks presidente Donald Trump (2017-2021) pa testiguá.
Entre e kuater aliadonan di Trump ku mester presentá den sala di Kongreso ta menshoná nòmber di Rudy Giulliani eks alkalde di New York i abogado di e eks presidente.
Bennie Thompson ku ta na kabes di e komishon investigativo aki a indika Rudy Giulliani a hunga un ròl sentral i importante den tur e mentiranan i kalumnianan relashoná ku un teoria di froude elektoral.
Tin sufisiente prueba ku Rudy Giulliani a hasi tur lokual tabata na su alkanse pa kambia resultado di elekshon presidensial di Novèmber 2020.
Huntu ku Rudy Guliani mester presentá otro dos abogado di Trump ku ta Sidney Powell i Jenna Ellis i eks asesor di Trump ku yama Boris Epshteyn.
Algu ku ta sigur di e kaso aki ta ku Donald Trump a hinka bastante hende ku ta asistié den problema serio ku hustisia miéntras e mes ta saliendo relativamente limpi for di e situashon aki.