RMHC Golf Classic 2022 un éksito rotundo

WILLEMSTAD – Djasabra pasá dia 3 di Sèptèmber 2022 Ronald McDonald House Charities Curaçao Foundation a organisá pa di 12 biaha e evento anual RMHC Golf Classic. Esaki a tuma lugá na Old Quarry Golf Course na Santa Barbara Plantation. Un evento eksitoso, kaminda spònsernan prinsipal di evento Maduro & Curiels Bank i KLM a hasi nan kontribushon.
Tabata tin 37 tim ku a partisipá den e torneo aki i kada tim tabata konsistí di 4 hungadó. A entregá premio na e timnan ku a keda na di tres, na di dos i na promé lugá. Tambe a entregá premio individual bou di e 148 partisipantenan. Tur esaki tabata donashon di diferente kompania na Kòrsou. Tabata algu úniko ku tabata tin 3 tim di mucha ku a partisipá den e torneo aki.
E fundashon ta wak bèk ku orguyo na un torneo eksitoso, kaminda e timnan a pasa hopi dushi ku otro, den un ambiente kompetitivo. Esaki tabata e torneo mas grandi te awor, ku e kantidat mas haltu di partisipante. RMHC ta sumamente orguyoso ku RMHC Golf ta e torneo di gòlf mas grandi i mas popular na nos isla.
Tambe RMHC Golf Classic a demostrá ku pueblo di Kòrsou ta karga e fundashon ku hopi amor i ta apoyá e mishon ku RMHC tin ku ta sòru pa ku e famianan di un mucha malu por duna nan yu e kuido optimal i tambe pa ta huntu den e momentunan difísil aki.
E fundashon ta hopi agradesí ku mas ku 100 kompania a duna nan aporte na e evento aki.
Dor di nan kontribushon RMHC por sigui brinda su servisionan na e muchanan malu i tambe nan famianan. Manera entre otro e uso di Family Room i tambe tur e programanan ku e fundashon ta ofresé pa e muchanan i nan miembronan di famia.

Entrega di premio RMHC Golf Classic 2022
Na di 3 lugá: Tim Notaris kantoor Moerdijk & Palm
Na di 2 lugá: Tim Ibis Management & Associates
Na di 1 lugá: Tim The Wine Factory, ku a konsistí di e siguiente partisipantenan; Juan
Almanocid, Ryan Breedijk, Berti Con, Hans Sluijser. E tim aki a gana un biahe pa
Amsterdam, ku un VIP Experience na Dutch Open.
Un danki di kurason na tur spònser di timnan, Tee’s i tur e bunita premionan, spesialmente nos spònsernan prinsipal di e evento Maduro & Curiel’s Bank i KLM.
Tambe palabra di agradesimentu ta bai pa e ‘main event sponsors’: Coca Cola, Heineken, All Signs, Canvas Company, Venequip, Massive Productions, Garage Cordia, Deli Nova, Wine Factory, Osteria Rosso, Kyoto, Old Quarry, Sandals, Jeep, McDonalds, General Catering, Lovers, Total Services Curaçao.
Un danki spesial na tur e boluntarionan ku semper ta kla pa yuda RMHC Curaçao
Foundation i tambe Jane Weststrate ku su tim kampion di Old Quarry Golf Course.