Rignald Yankee a presentá su buki “Kanta pa Señor …ku Sabor”

Djaluna anochi Sr. Rignald Yankee a presentá su buki “kanta pa Señor …ku Sabor”. E buki aki ta unu hopi importante ya ku ta trata di e parti litúrgiko di kantikanan ku kornan ta kanta den misa. Maestro di Seremonia Sr. Francis Delanooy a trese pa dilanti ku lamentablemente hopi Kor no òf kier komprondé e importansia di tene kuenta ku e kantikanan ku nan ke kanta den misa. Durante di kada sakrifisio di misa bo tin ku realisá ku no ta asina asina bo ta kanta un kantika. E kantikanan ku kor ta kanta mester kuadra ku e liturgia di e momentu ei.

Den pasado hopi biaha tabata tin saserdote ku tabata ninga pa kor kanta sierto kantikanan ora ku promé ku misa kuminsá, e saserdote ripara kual ta e kantikanan ku e kor a entrega pa kanta.

Rignald Yankee ta spera ku por a duna un kontribushon ku su buki pa enrikesé nos kantikanan oral ku nos ta kanta den misa. E a gradisí tur personanan ku a yud’e pa e buki por a keda kla i un palabra spesial a bai na Sr. Dennis Alse pa su aporte balioso. No solamente Dennis pero diferente otro persona tambe a yuda pa yega na e produkto final di e buki.

Rignald Yankee tabata tin intenshon pa presentá un konsierto ku su kor di mas di 60 persona pero mirando e rumbo ku Covid a kohe, mester a redusí su kor na 20 persona. E agrupashon hubenil di Sr. Dennis Alse a kompaña e koro.

Pero promé ku esaki Rignald Yankee a entrega un kopia di su buki na Mgr. Luis Secco komo e outoridat mas altu di nos Iglesia Katóliko den nos diósesis. Tambe ministernan Cijntje, Larmonie Cicilia, i Van Heydoorn kende tabata representá pa Sra Lisette Velder Sambo a haña un buki.

Aparte di e persona ariba menshoná tambe algun otro persona nan tambe a risibí un buki. E kombinashon di e kor di Orfeon Alegro di Sr. Yankee huntu ku e agrupashon di Sr. Dennis Alse a duna bo un bunita entrekambio di hóben i hendenan un tiki mas madurá. Den e grupo di Sr. Dennis Alse tin hopi hóben ku di un manera fantástiko, ta dominá un òf otro instrumènt. Esaki sigur ta duna bo speransa ku Kòrsou tin futuro riba tereno musikal.

Ban spera ku pronto e pandemia aki ta tras di lomba pa nos por disfrutá atrobe di e kor Orfeon Alegro ku tur su integrantenan. Di parti di Sr. Yankee i henter Kor Orfeon Alegro un felis i próspero 2022 pa Pueblo di Kòrsou.

Riba e potrètnan por mira kon parti di e anochi a transkurí. Den edishon di djabièrnè awor Pagina Katoliko nos lo amplia ku mas potrèt.