Revlon gigante den produktonan di kosmétika a bati bankarota

NEW YORK – Debra Perelman presidente di Revlon a emití un komunikado indikando ku boluntariamente nan opta pa Chapter 11 (bankarota) na Korte di New York.
Ron Perelman (79) akshonista mayoritario den Revlon a pasa batuta pa su yu muhé Debra Perelman (47) na 2018.
Revlon a hañe konfrontá ku problemanan finansiero na 2020 debí na e pandemia di Covid-19 i ku yudansa di e magnate Ron Perelman a evitá di bati bankarota. Debra Perelman a logra tene Revlon na bida durante 2021 pero debí na e inflashon na nivel global produktonan di kosmetika no ta bende manera tabata e kaso ku den pasado.
Informashon finansiero di Revlon ku a keda divulgá ta ku den prome trimèster di 2022 e kompania tabatin un debe di $3.310 mion i ku su akshonnan riba Bolsa di Wall Street tabatin un balor di solamente $123 mion. Debra Perelman a splika ku e debe di Revlon a subi konsiderablemente entre mart pa fin di mei i ku no a keda ningun otro opshon di bai korte opta pa Chapter 11 (bankarota).
Den kaso ku si korte aseptá Bankarota ku Revlon a pidi e kompania por buska un fiansa di $575 mion pa restrukturá e empresa.
Revlon ta representá markanan manera Elizabeth Arden, Mitchum, Cutex na 150 pais na nivel global i tin riba 6.000 persona ta laborá pa nan.