Retiro definitivo pa ‘toko den toko’ di `pseudo’ trahadó di Kas di Bario SOAW

Willemstad. Un kaso laboral ku karakter di toko den toko hinkando hende di edat den kas di kuido sin informá su superiornan.
E señora amtenar veterano tabata disponé di informashon ken ta buskando lugá den kas di kuido pa nan famia i a pasa e informashon aki pa un amiga ku tabata bai lanta un kas di retiro asina.
Na final tur kos a kaba na aros di koko pasobra banko no a duna e amiga fiansa i Ulanda no a manda e plaka priminti i asina e plan a frakasá den tòm.
Pero e señora ku a intermedia a pèrdè su trabou i tur su añanan i servisio tambe.
Komo amtenar ela faya ku regla di integridat, konfiabilidat i responsabilidat.
For di 2019 gobiernu a pone e amtenar riba non-aktif komo Adviseur Consulent-A na kas di bario Santa Maria.
Na 2018 hefe dje señora a hole chanchuyo i a laga investiga.
Nan a haña denunsia ku fuera di su trabou normal e tabata buska kliente pe kas di kuido privá Elderly Eden.
Sperando e informe final a pone e señora riba non-aktif na maart di 2019 i ela apela naturalmente.
Siguiente paso tabata duna e señor retiro pasobra ela hasi mal uso di informashon di Kas di Bario pa manda kliente di SOAW den Elderly Eden.
Ela ofresé e famianan lugá den Elderly Eden i e klientenan a kere ku tabata un kas supsidiá pa gobiernu.
Esei tabata un fayo profeshonal masha serio.
E señora a gana e kaso den promé instansia pasobra gobiernu su abogadonan a faya di produsi dokumento relevante pa proba e kaso i korte ta husga kaso riba informashon konkreto.
Pa korehi nan eror, gobiernu a bai den apelashon i a bai ku testigu e biaha aki pasobra sin konvikshon ku dokumento korte no por kondena e señora maske e prueba ta palpabel pero no konkreto.

KUENTA DI HADA
Loke a bin dilanti den apelashon parse un kuenta di hada.
E biaha aki Korte di Hustisia a tende e vershon ku ta un bon amiga dje amtenar a bin ku e plan pa lanta Elderly Eden i ela ofresé di yuda su amiga.
Sakando nomber di kandidatonan ku tabata buska lugá pa keda ela saka nomber for di kompiuter di Kas di Bario ilegalmente i presentando komo trahadó sosial ela organisa un Open Dag dia 2 di september 2018 i a gancha tres kliente.
Pero e tres klientenan mes mester a paga tur gastu siendo ku si ta Kas di Bario a manda nan, nan no mester a paga nada.
E lugá a keda habrí nèt 20 dia.
Resultado tabata ku Kas di Bario mester a buska lugá otro kaminda pa e tres klientenan.
Ta ora un ruman di e tres klientenan a duna testimonio kiko a pasa i prueba ku ela paga e kas di ansiano fantasmagoriko a basha den otro.
Loke e amtenar a hasi no tin pordon i uniko alternativa tabata pa duné retiro permanente.
E daño ku e señora a hasi den imahen di Sociale Zaken ta muchu profundo i Korte a korehi loke wes den promé instansia a keda di hasi i a konfirma retiro dje señora.