Resistensia kontra dje norma pa nivelá tòp salarionan

WILLEMSTAD – Mientras ku e preshon di Hulanda ta kologá riba nos kabes, pa pasa e lei ku ta nivelá top salarionan, ta surgi kresiente resistensia serka funshonario altu pa e formula ku ta usa pa aplika adaptashon di e salarionan altu di trahadónan di kompanianan privá di gobièrnu.
Komishon Sentral di Parlamento ayera mester a trata e lei di nivelashon i entradanan altu. Parlamento a disidi sinembargo pa skòrs e reunion te otro aviso, pendiente di risibi un briefing tékniko riba e asuntu aki.
Ku nivelashon di e norma mester bin un máksimo pa salarionan anual den e sektor publiko-privá, di 263 mil florin.
Tin indikashon ku un parti grandi di e entitatnan ligá ku gobièrnu, ku ta di akuerdo ku e lei. Pero nan tin problema si, ku e manera kon ta yega na e lei.
A stipula e maksimo riba 130 porshento dje salario anual di minister presidènt.
Pero e otro kondishonnan sekundario nó ta inklui. Ademas e funshonarionan altu ta opiná ku e periodo di transishon di dos aña, pa introdusi e norma nobo ta muchu kòrtiku. E suma máksimo segun e funshonarionan mester ta 535 míl florin pa aña.
Mientrastantu awe mainta Antilliaans Dagblad a publika ku e tòp funshonarionan di NVnan di gobièrnu a manda un karta pa Konseho di Minister, den kua nan ta menshoná nan desakuerdo ku e norma. E karta ta firmá pa e funshonarionan top di e kompanianan: Aqualectra, Curiol, Curacao Airport Holding, ADC, Curinde, Sociale Verzekeringsbank, Buro Telecommunicatie & Post i Dutch Caribbean Air Navigation Service Provider.
E korant na hulandes ta menshoná tambe ku esnan ku a firma e karta, ta indiká ku despues ku nan a studia e lei, ta konkluí ku e norma ta ta stipula a base di informashon ‘inkorekto’ i inkompleto.
Tin indikashon ku CPA, KTK i Banko Sentral tambe a traha un karta, relashona ku e topiko aki.

BISHITA NA
PARLAMENTO

E sindikatonan di Aqualectra, SEU, STKO i STK a bai parlamento ayera pa papia ku parlamentarionan riba nan preokupashon relashona ku e lei di Optimalisering Overheids Gelieerde Entiteiten. E proposishon aktual ta mishi ku tur trahadó i no solamene direktor, segun Augusto Martis, presidente di sindikato SEU.
E preokupashon dje sindikatonan ta, ku tratamentu dje e lei di salarionan tòp, ku originalmente su preparashon mester a kuminsa ayera, no ta basa riba e informashonnan korekto.
Martis: ‘’Nos no ta kontra di e lei, nos ta hasta di akuerdo ku mester bin un lei asina’’. Pero tin kalkulonan no korekto, ku a pone ku e montante a baha di tal forma ku e ta drenta den e struktura di salario dje trahadónan di staf. Esaki segun Martis, ta basha e struktura di salario abou.
E sindikatonan lo manda informashon adishonal pa e parlamentarionan pa nan tambe por lesa i tuma kuenta di loke ku nan ta papia di dje.
Komo sindikato di un NV, bo partner di kombersashon no ta gobièrnu. Esaki ta nifika ku nan no tin un Plataforma pa skucha nan. Ta pesei ta di e forma aki so e sindikatonan por a pidi atenshon pa trese e preokupashon dilanti, na nomber di nan miembronan.