Reserva Federal a fiha tasa di interes mas haltu den último dos dékadanan

WASHINGTON – Jerome Powell presidente di Reserva Federal (Fed) di Merka a konfirmá ayera durante su rueda di prensa ku nan mester a subi tasa di interes di referensia na medio punto pa buska manera pa frena inflashon.
E subida di tasa di interes aki ta keda konsiderá komo esun di mas haltu realisá pa Reserva Federal for di 1994.
Lokual ku Reserva Federal lo bai trata na hasi ta purba regulá inflashon na Merka konsiderando ku kosto di bida riba tur nivel a subi drástikamente.
Konsekuensia ku Reserva Federal a fiha tasa di Interes aki ta ku e práktika aki lo bai afektá miónes di persona, sentenáres di empresa grandi, mediano i chikí.
Esaki ta debí ku interes riba fiansa na banko lo subi konsiderablemente.
Analistanan finansiero ta premirá ku e medida aki lo bai empeorá e situashon na Merka konsiderando ku e merikanonan ta bou di hopi preshon kaba trahando dos pa tres trabou pa asina por kumpli ku nan obligashon i awor tin ku bai paga mas na fiansa pa por sobrebibí.