Remitido Hubert Paulina danki pa bo amistat

Siman pasa e notisia tristu a drenta ku e konosido periodista Hubert Paulina a bai sosegá. Apesar ku despues ku ela baha ku penshun for di Gobièrnu nos no tabata topa hopi, tòg mi pensamentu tabata riba dje.
Tempu bon di prensa na Kòrsou, kaminda no tabata tin tur e teknologia manera tin awe, nos komo periodista sigur den añanan 80 mester a move pariba pabou, hasi entrevistanan profundo, anto sin selular, sin whatsapp, sin kòmpiuter pero ku poko mashin pretu grandi di e marka Olivetti, sigur den korant. Awendia tur e kosnan aki a kambia, loke ta masha bon mes.
Ami a konosé Hubert Paulina den prensa.
Ami na La Prensa i Hubert na Z86. Nos tabata topa konstantemente den konferenshanan di prensa di polítikonan grandi di Kòrsou, Aruba, Boneiru, St. Maarten i Ulanda.
Despues di tempu, Hubert Paulina a bin traha komo part time na La Prensa, tempu ku nos tabata Hefe di Redakshon di e prestigioso korant aki i aki nos a sera mas ku otro komo hende. Un persona trankil, un pèrsona ku ta dediká den tur loke ku e ta hasi.
Despues di tempu el a tuma e desishon pa bai traha na PR di Gobièrnu di Kòrsou i ei tambe nos a keda ku komunikashon ku otro te ora na 1999 mi tambe a dal e stap i move den direkshon di Gobièrnu.
Despues di tempu, mi a bin topa ku Hubert Paulina na Dienst Communicatie & Voorlichting (DC&V) di Teritorio Insular di Kòrsou.
Nos a traha masha masha bon mes, sigur mirando ku nos dos pero tambe algun otro kolega tabata oriundo di prensa i sa presis kon e asuntu aki ta hinká den otro.
Banda di a traha huntu, mi mester bisa ku huntu ku Hubert Paulina nos a forma Prensa Uni. Mi mes no a bira Presidente na 1988 paso mi a bai Boston pa studia, pero despues ku mi a regresá den añanan 90 mi a enkabesá Prensa Uni komo un organisashon ku mester a Sali na interes di Periodistanan di Kòrsou.
Hubert Paulina tabata un persona trankil, ku ta analisá kosnan i mas ku tur kos semper semper e tabata bini ku solushon pa kualkier situashon ku a surgi.
Komo un persona mas grandi ku nos, semper e tabata risibí nos rèspèt, mirando no solamente e tabata tin un bagazje di eksperiensha su tras, pero su kompania so tabata trese trankilidat. Hubert tabata un persona respetuoso i di mes bo no tabata buska un pleitu ku n’e.

E notisia di su morto a kai duru. Hopi biaha nos tabata papia di su yu hòmbernan.
Tempu nos tabata traha huntu nos tabata papia di esun mas chikitu ku awe mi ta kere mester ta un hòmber grandi kaba.
Pa esnan ku ta relativamente nobo den prensa, nan no sa kiko Hubert Paulina a nifiká pa prensa di Kòrsou. Un persona ku ora bo ta topa semper ta alegre pa bo papia ku n’e i profeshonal den su trabou.
Hubert, amigu lo bo hasi falta i sigur
Broer, sosegá na pas