ReMaUni ku atvertensia serio: “Mayornan papia i buta òrdu riba bosnan yu!!”

WILLEMSTAD. Esaki ta último atvertensia pa STOP di hinka kabes den santu i bira kara pa realidat i hasi komo sifuera tur kos ta bon den enseñansa!
10 aña pasá novèmber 2002, gobièrnu Antiano di e tempu ei a sinti e nesesidat di bin ku un grupo di mayor pa gana mayornan mas partisipe i envolví den enseñansa.
Esaki, pa asina logra ku e skolnan ta bira mas seif i sigur komo ku for di e tempu ei tabata tin e fenómeno ku mayornan ta drenta skol bai buska kuenta i rason ora kos bai robes ku nan yunan.
A hasi un apelashon na tur skol espesialmente skolnan di Fundeshi, pa manda un representante di un miembro di nan komishon di mayor.
For di e grupo aki a skohe 8 mayor pa representá e mayornan ku tin yu inskribí na e diferente skolnan ku tabata kai bou di e diferente direktivanan di skol.
Asina Representashon Mayornan Uní, ReMa Uní, a lanta 17 aña pasá.
A yega momento pa Parlamento tambe kai aden! Mester adapta i kambia leinan mester ahusta e leinan na e tempu ku nos ta biba aden.
Mester sòru pa e leinan tin e mayor tambe envolví den skol kaminda ta pone nan responsabel pa e aktonan di vandalismo i violensia di nan yunan.
Mester sòru pa enseñansa ta garantisá i stop di kòrta den prosupuesto di enseñansa ku e direktivanan di skol ta kuminsa atende ku bienestar di mucha na promé lugá en bes di pensa riba sèn!
E tapeit ku nan tin kos ta tapa bou di dje a bola i tur kos ta Sali for di bou di dje.