Rekuperashon ekonómiko di nos union monetario lo sigui

Willemstad/Philipsburg –Debí na e oumento eksorbitante di preis di materia prima, ta premirá ku inflashon lo subi konsiderabelmente den 2022 i ku e lo keda haltu den 2023.
‘Apesar ku e inflashon haltu ta suak forsa di kompra di e konsumidónan i di e manera ei tambe konsumo privá, Banko Sentral ta proyektá ku aktividat ekonómiko lo sigui rekuperá den tur dos pais di e union monetario.
Pa Kòrsou, ta proyektá ku e Produkto Interno Bruto real lo krese ku 5,5% e aña’ki mientras ku Sint Maarten lo registrá un ekspanshon di 5,8%.
Na 2023, e kresementu lo ta mas moderá i e ekonomianan di Kòrsou i Sint Maarten lo krese ku 2,9% i 3,6%, respektivamente’, asina Presidente di Banko Sentral Richard Doornbosch a splika.
Den e Boletin Ekonómiko di sèptèmber, Banko Sentral a presentá su perspektiva ekonómiko revisá pa Kòrsou i Sint Maarten.
Pa e promé kuartal di e aña’ki, e indikadónan ekonómiko ta mustra ku tantu Kòrsou komo Sint Maarten ta sigui sinti e benefisionan di reapertura di ekonomia i ku a fleksibilisa e restrikshonnan di biahe.
‘Impulsá pa e rekuperashon vigoroso den turismo di estadia, tabatin aktividat ekononiko a reaktiva fuerte den tur dos pais di e union monetario.
Den e periodo di yanüari–mart 2022, e Produkto Interno Bruto real a ekspandé ku 19,0% na Kòrsou i ku 19,9%’ na Sint Maarten.
Na tur dos pais, demanda neto for di eksterior ta loke mas a impulsá e ekspanshon sólido akí, ya ku eksportashon a subi mas ku importashon.
Demanda privá, i spesífikamente invershon, tambe a kontribuí na e kresementu di Produkto Interno Bruto real, ounke na un manera limitá.
En kambio, demanda públiko (gobiernu) a baha.

E datonan pa kada sektor ta mustra ku, manera tabata di spera, mirando e oumento grandi den yegada di turista di estadia, e sektornan ku mas a kontribuí na e kresementu di PIB real na Kòrsou i Sint Maarten ta e sektor relashoná ku tu turismo.