Rebendedó di number na Ulanda lo kai será si e bolbe bende number

ROTTERDAM. No ta pornada bendementu di number of lotto ta prohibi na Ulanda.
E ta prohibi no solamente pa evitá ku hende ta bira adikto na wega di plaka pero alabes pa protehá klientenan i frena kriminalidat i ilegalidat.
Den un sistema di pèrmit ta posibel pa di antemano tene supervishon riba riferonan.
Den kaso dje señora Kurasoleño di Dordrecht ku wes a klap un but di kasi shenmil heldu ta pasobra ela double-cross e maneho di gobiernu riba wega di plaka di un manera inaseptabel.
E tribunal a tira bista riba pasado dje señora i a nota ku te prinsipio dje luna aki e tabatin un karchi di kastigu limpi.
Konsiderando kuantu aña ela bin ta bende number, konsiderando e merkado grandi ku e tabatin.
Tambe konsiderando ku ela haña varios atvertensia ku e negoshi a drai i ku hasta ela haña atvertensia di alkalde di Dordrecht i tòg a sigi, e tribunal a haña ku kastigu di prizon di un luna kondishonal ta na su lugá.
Esei ta pa e sa ki ta ward’é si e sigi bende number.
Kontrali na loke fiskal a pensa ku un but fuerte no ta na su lugá, e tribunal sí ta haña ku un but fuerte ta na su lugá.
Polis a detené e señora november di 2018 i e tabata sa ku lo hibé dilanti wes.
Pero pa motibu fuera di kulpa dje señora, a tarda pa hiba e kaso korte pero no ta duné kredito pa esaki.
Por lo tantu e veredikto a bira un luna di kastigu di prizon kondishonal ku e no tin nodi di sinta basta e no faya den e proksimo dos añanan.
Dia 13 di oktober 2023 e periodo di prueba ta kaba pero esei no ta nifika ku e por reanuda su bendementu di number.