Raymond Begina a logra mantené su titulo di master 60 plus di tènis di mesa

WILLEMSTAD (C) – Raymond Begina a mantené e titulo di Master 60+ dor di keda invikto den e torneo di e aña aki, ku tabatin hopi bataya.
Begina, ya pa hopi aña kaba ta dominá e kategoria di Master 60+.
E aña aki hopi hungadó di taya a prepará serio pa baha Begina for di e trono di 60+.
E torneo tabata fuerte ku weganan riba nivel i skorenan hopi pèrta.
Por menshoná ku tabatin asta un tripel empate entre e hungadónan Rouchell Hernandez, Raymond Cathalina i Peter Wong.
Despues di a konta punto pa punto, e hungadónan Rouchell i Peter a klasifiká pa e siguiente buelta.
Den e weganan di semi-final Begina a gana Rouchell Hernandez ku skor di 2-1.
Ralston “Lalo” Arvelo a sorpresá Peter Wong ku e skor di 2-1 pa e bai topa Begina den final.
Den final Raymon Begina a gana Lalo ku e skor di 3-0 pa titulá kampeon di e torneo.
FTMK ta gradisí e públiko grandi ku tabata na sala di pin-pòn i tambe tur esnan ku a sigi e weganan via life Streaming.