Rapper Jon Tarifa ta kolaborá ku kantante Darren Gardner den ‘When I was Younger’

WILLEMSTAD – Ku e kansion, ‘When I Was Younger,’ rapper Jon Tarifa, huntu ku kantante i eskritor Darren Gardner, ta ilustrá kon fasinante e mente di un mucha ta, unda nada ta strob’e pa perseverá i eksplora mundu.
E impulso pa eksplora teritorio deskonosí a hiba Darren, ku originalmente ta di Port Elizabeth, Suráfrika, te na Hulanda, unda na 2016 ela muda pa forma su bida ku su pareha Elsa. Na Hulanda ela haña e oportunidat di sigui desaroyá su talento musikal, unda ela traha ku diferente artista di tanda manera DJ Martin Garrix i ganadó di e premio Grammy Chris Henderson. Tambe Darren a skibí i areglá komposishonnan musikal pa, entre otro, Berget Lewis, i ZO Gospel Choir. Darren ta konsiderá e talentoso kantante i areglista kurasoleño, Stanley Clementina, komo su mentor, kende a introdusí’e na e industria musikal hulandes. Di e manera aki, Darren a keda eksponé na e diferente influensia musikal krioyo i a desaroyá un konekshon bunita ku nos islanan.
Ken ta Darren Gardner?
Darren Gardner a studia músika klásiko na Universidat di Pretoria na Suráfrika, unda ela spesialisá den Vokalisashon Klásiko i Ingeniera di Sonido, pero su amor pa músika ta bin di kas. Darren a lanta den un famia ku a eksponé na artistanan manera, the Beatles, Nat King Cole, Dionne Warwick, Mariah Carey, Lauryn Hill, i asta kompositornan klásiko manera Mozart i Beethoven. Konsekuentemente, Darren su músika ta saturá pa influensianan di pop, R&B i jazz. Komo estudiante, Darren a diskubrí su pashon pa arte ora ela forma parti di vários koro di skol i a presentá riba diferente tarima. Despues di a forma parti di algun banda, Darren a opta pa kontinuá komo solista i kontinuá traha riba su karera komo kantante i eskritor. Na 2020, Darren a partisipá na Holland Got Talent i duna un presentashon impreshonante ku ‘I Wish’ di Stevie Wonder, unda ela kanta i utilisá un diferente instrumento huntu ku un mashin di drùm pa konstruí e ritmo di e kantika.
Kolaborashon ku Jon Tarifa
Ku e proyekto aki, Darren a kolaborá ku e talentoso rapper albanes, Jon Tarifa, ku tambe ta basá na Hulanda, ken a pone su toke úniko riba e bunita konsepto musikal. E videoclip di ‘When I Was Younger’ a keda dirigí pa ItsmeKenny na Hulanda i Jon Tarifa a editá e produkto final. Darren a traha e konsepto i melodia di ‘When I Was Younger’ i a pone e base pa e areglo, pa despues laga produktor Wesley Nuis finalisá e kantika.
Jon Tarifa no ta un artista deskonosí pa nos aki na Kòrsou, despues ku ela skor un hit na 2011 ku su debut titulá “So Right’. Tambe ela keda invitá e aña ei pa presentá na Curaçao North Sea Jazz Festival ku kantante Levi Silvanie. Aktualmente, Jon ta biba na Bali, Indonesia, I e ta den e etapanan final di finalisá su album nobo, ku ta karga ku yen vibrashon isleño.
Plannan pa futuro
Aktualmente Darren ta trahando riba un EP ku e ta spera di lansa na 2023, pero ya ela duna nos un ñapa ku ‘When I Was Younger’. “Tempu nos tabata yòn, nos tur a soña i a aspirá pa un dia bira algu grandi,” Darren ta splika. E kantika ta papia netamente di e nostalgia ei i kon e mucha di paden ta biba den nos tur. Aktualmente Darren ta trahando riba su siguiente piesa ku guitarista i produktor Wesley Nuis, i ta spera di publiká esaki na kuminsamentu di 2023.
Bo por sigui Darren Gardner su músika via di su Instagram @darrengardnermusic pa keda na altura di su presentashonnan. Tambe por wak e clip di ‘When I Was Younger’ riba e página di You Tube di Jon Tarifa na https://youtu.be/rQt4qAr5LyA