Rapòrt di estado di (des) integridat den Kuerpo polisial ta bergonsoso

WILLEMSTAD. E rapòrt interino ku Konseho pa Mantenshon di Lei na Kòrsou i te ku 101010 na Antia a kaba di emití ta pinta un imáhen ménos doloroso di e miembronan di Hermandad ku pa lei I pa huramentu mester ta garantisá a pueblo ku alo ménos e sirbidónan di pueblo uniformá i na sivil tin e grado di integridat pa konfia nos seguridat na nan akshonnan.
Husgando pa e añanan ku e humilde sirbidó aki a bin ta sigi funshonamentu di kuerpo polisial, mester señalá ku no ta awor tin elementonan sin eskrupulo den tur rango di kuerpo polisial sino ta pa desenas di aña e ta eksistí. Di Alto Komisario e polis razu tabatin ‘despelote’ den e ramo ku a enkargá ku nos protekshon.
Ofisialmente ora un agente polisial kometé violashon di integridat, esei ta afektá e bon nòmber i konfiabilidat di kuerpo polisial.
P’esei Kuerpo polisial mester ta strukturá di tal manera ku por prevení violashon di integridat. Pa e motibu akí, konseho pa Mantenshon di Lei (RvR) ta kontrolá si Kuerpo Polisial di Kòrsou (KPC) tin lo nesesario pa garantisá integridat den KPC i pa hasi investigashon disiplinario (den kuadro di integridat) na un manera adekuá.

SITUASHON
SERIO
E maneho aktual di KPC ta rekerí atenshon serio, ya ku tin sierto kondishon esensial ku no ta kumpliendo kuné.
· No tin training di integridat (riba un base kontinuo)
· ni kòntròl na e sitionan di trabou
· falta medida di prevenshon pa komportashon indeseá por wòrdu señalá trempan
· a konstatá ku Kuerpo Polisial su sistema di sanshon (apliká kastigu disiplinario) no ta transparente i no ta ofresé siguridat hurídiko.
Un defisiensia grave ta ku no ta den tur kaso e susesivo Ministernan di Hustisia ta tuma desishon na tempu riba proposishon pa imponé sanshon disiplinario. Esakinan ta e Konseho su konklushonnan a base di e investigashon. Artíkulo 45 di Lei di Reino ku ta regla organisashon di Kuerpo Polisial (Rijkswet Politie) ta stipulá ku esnan outorisá pa hasi nombramentu di empleado públiko di polis mester pèrkurá pa formulashon di un kódigo di kondukta. E kódigo di kondukta i e kódigo profeshon ta fihá den e ley riba posishon hurídiko, ku ta forma parti di ley di instrukshon di e profeshon di Polis (Ambtsinstructie Politie). Tin tambe un sistema di sanshon pa sanshoná esnan ku violá e kódigonan. E sistema di sanshon akí ta forma parti di e ley riba posishon hurídiko ya menshoná.