Ramiro Griffith, presidente di FFK: “Mi ke traha duru i sigi drecha kos”…

• E flamante presidente di Federashon di Futbòl di Kòrsou Sr. Ramiro Griffith a bira presidente di nos federashon pa asina duna algu bek.
E ta rekonosé ku deporte a nifiká masha hopi pe. I awor ta su oportunidat di duna algu bek na deporte i futbòl.
“Si mi por hasi algu bek, lo mi no ke keda sin hasiele”, e la deklará.
Ramiro a rekonosé ku pa hopi aña e la bishita kasi tur vèlt di futbòl na Kòrsou.
Ramiro a revelá ku e tabata scout muchanan talentoso.
Inkreibel kuantu talento nos tin riba e Isla aki. “Mi ke traha duru i sigui drecha kos, paso tin kos ku a wòrdu bon hasí tambe”, e la deklará den kombersashon den Deporte Hoyer.
E ta mira hopi futuro pa nos muchanan den futbòl, mucha hòmber i mucha muhé.
Tin masha hopi posibilidat. E ta kere ku nos tin di lanta nos nivel di training. “Mi a bini pa yuda futbòl di Kòrsou, i sostené e deporte den su totalidat”, asina Griffith a deklará. Ramiro a hunga futbòl profeshonal na Ulanda i tabata den e organisashon di FC Heerenveen.
E tin eksperensia ku entrenadonan manera Fobbe de Haan.
E la hunga den “Keuken Divisie” ku e organisashon di Veendam. “Ku disiplina i trabou duru bo por logra hopi kos”, asina Ramiro Griffith a añadí.
Ramiro a nase den e bario di Domi Abou.
E la biba tambe den Kwartier i ta un mucha di bario.
Semper e la hasi su bèst pa logra, paso su Mama mester a traha duru.
Ramiro ta “Register Accountant” i tin un trabou di hopi responsabilidat aki na Kòrsou.
“Mi deseo ta pa kontribuí i duna bek, nada mas”, e la sigurá.