Quincy Girigorie a manda mensahe fuerte pa Ulanda na nòmber di Kòrsou

WILLEMSTAD. E lider politiko di partido PAR i parlamentario mr. Quincy Girigorie a manda un mensahe pa e mandatarionan ulandes di Interior i Relashon den Reino pidiendo pa laga nos atendé huntu ku historia di sklabitut i krea un futuro nobo den Reino Hulandes.
Motibu di su karta tabata bishita dje mandatario i parlamentarionan den kuadro di e proseso ku a inisiá a base di e rapòrt “Ketenen van het Verleden” ku a traha riba èks Minister di Interior i Relashon ku Ulanda, sra. Kajsa Ollongren.
E rapòrt aki ta papia palabra kla.
Ta importante pa estado Hulandes atendé porfin di manera digno ku e ròl ku e tabatin den e negoshi di sklabitut i tambe ku esaki su konsekuensianan te ku e dia di awe den komunidat Hulandes. Pero mas aun den e Islanan Karibense di Reino. E lider politiko di PAR ta haña ku estado Hulandes mester pidi diskulpa pa esaki i mester traha realmente na restourashon di e konsekuensianan di su akshonnan.
Girigorie mes ta un di e míles di desendientenan direkto di katibu, ela nase, haña formashon i ta biba den un komunidat kaminda un parti grandi di su pueblo ta konsistí di desendientenan direkto di esnan sklabisá.
Na su opinion, rekonosementu di parti di estado Hulandes di su ròl den sklabitut i diskulpa pa esaki, ta e promé paso real riba e ruta di restourashon i igualdat.
Komo tal, durante di e promé bishita di e delegashon di e komishon fiho di Asuntunan Interno di Parlamento Hulandes, tabata importante pa ela komprondé e intenshon real di e bishita. Tabata importante pa nos topa otro na promé lugá komo hende, pa despues nos atendé e tema delikado, pero sumamente importante aki riba plataforma polítiko.