Pronóstiko di poblashon Hulanda Karibense 2021-2050

Corina Huisman i Coen van Duin

CBS a traha un pronóstiko di poblashon nobo pa e munisipionan di Hulanda Karibense. Den e memo aki ta duna un splikashon di e resultado- i diferensianan mas importante kompará ku e pronóstiko anterior di 2020.
Den e pronóstiko aktual di poblashon, a prosesá datonan resien. E informashon adishonal aki tin partikularmente influensia riba loke ta spera pa imigrashon i emigrashon. A hasi kalkulashonnan nobo di e komportashon di regreso di migrantenan. Den e pronóstiko anterior, esakinan tabata basá ainda riba datonan tokante migrashon te ku 2017, i awor esaki ta te ku 2020. Tambe a rekalkulá e patronchinan di edat di imigrante- i emigrantenan basá riba e datonan nobo.
E pronóstiko nobo ta premirá un emvehesimentu ménos fuerte di poblashon di e islanan kompará ku e pronóstiko anterior. Segun e pronóstiko nobo, un proporshon mas grandi di imigrante di Hulanda Oropeo lo bai bèk di manera ku e proporshon di grandinan riba e islanan lo oumentá ménos fuerte. Ta ferwagt ku e kantidat di habitante di Hulanda Karibense lo oumentá di 27 mil na e momentunan aki pa 31 mil den 2030. E pronóstiko di aña pasá tabata spera algu ménos ku 32 mil habitante den 2030.

Suposishonan di migrashon, corona

E pandemia di corona ta hungando un ròl for di mart 2020. Ta parse ku tantu emigrashon di personanan ku a nase na Hulanda Karibense komo imigrashon di personanan ku a nase pafó a keda limitá pa e motibu aki. E espektativa ta ku e saldo di migrashon nèto (imigrashon deskontando emigrashon) pa 2021 ta mas òf ménos 200 mas abou ku lo tabata e kaso sin e pandemia.

Ta ferwagt ku e redukshon aki ta temporal. A asumí ku e influensia limitativo di e pandemia riba emigrashon di personanan nasé na Hulanda Karibense den 2023 lo a keda redusí te na un terser parti i den 2024 lo a disparsé kompletamente. Ta asumí esaki tambe pa imigrashon for di Hulanda Oropeo. A asumí ku imigrashon for di otro paisnan pafó di anterior Antia Hulandes lo keda redusí un tiki mas largu. E konsekuensianan ekonómiko di e pandemia riba por ehèmpel turismo, por dura un tiki mas, loke por limitá e demanda pa trahadónan estranhero. A asumí ku serka e grupo aki e restrikshon di imigrashon lo baha na mitar pa 2023 i lo disparsé kompletamente den 2025. Ta parse ku emigrashon for di Aruba, Kòrsou i Sint Maarten ya no ta limitá mas pa e pandemia.

Suposishon di migrashon, riba término largu

Segun e kalkulashonnan nobo, un proporshon mas grandi di imigrantenan nasé na Hulanda Oropeo finalmente lo bolbe bai: 91 porshento, kompará ku 75 porshento den e pronóstikonan di 2019 i 2020. Ta resultá ku imigrantenan ku ya tin algun aña na Hulanda Karibense, ta imigrá tòg mas frekuente ku segun kálkulonan anterior. Tambe e porsentahe ahustá di salida di imigrantenan di Aruba, Kòrsou i Sint Maarten ta mas haltu (66 porshento di salida en bes di 50 porshento). E espektativa pa loke ta trata imigrantenan for di otro paisnan, ta ku e proporshon ku ta bai bèk, al kontrali, ta keda redusí un tiki (76 porshento na lugá di 80 porshento). E espektativa di e proporshon di emigrantenan nasé na Hulanda Karibense ku finalmente ta bai bèk tambe a keda redusí: di 57 porshento pa 54 porshento.
E patronchi di edat di imigrante- i emigrantenan a kambia e último añanan i pa e motibu ei, a kalkulá nan di nobo pa e ‘update’ aki. Den e pronóstiko di 2019 i 2020, e sifranan tokante 2011-2017 tabata determinante na momentu di kalkulá e patronchinan aki, ku awor ta aktualisá pa 2015-2019. E ahuste mas importante tabata na e patronchinan di edat pa emigrashon. Segun e kalkulashonnan nobo, un proporshon mas chikitu di imigrante ta konsistí di personanan den kareda di binti aña i un proporshon mas grandi di edat medio òf mas grandi.
Meskos ku den e pronóstikonan di 2019 i 2020, for di 2050 ta asumí un saldo di migrashon sero, pues anualmente mes tantu imigrante ku emigrante. Entre 2030 i 2050 a asumí ku e saldo gradualmente lo baha te sero.

Suposishon di mortalidat

Desde komienso di e pandemia a registrá 17 morto pa motibu di Corona na Hulanda Karibense (situashon entrante 26-7-2021). E pronóstiko di 2020 a asumí solamente algun morto èkstra pa aña pa motibu di corona, debí na e poblashon hóben di e islanan i pa motibu ku te ku mei 2020 ainda no a mira mortalidat èkstra. Den 2020 e total kantidat di morto na Hulanda Karibense tabata 19 mas tantu ku loke tabata spera. Tambe pa 2021 ta spera ku mortalidat lo ta un tiki mas haltu debí na corona. Pa e añanan despues, meskos ku pa e pronóstiko anterior, ta asumí ku e riesgonan di mortalidat pa habitantenan di Hulanda Karibense ta baha ku e mes un ritmo ku pa habitantenan di Hulanda Oropeo. Pa Sint Eustatius ta spera riba término mas largu ménos morto ku den e pronóstiko di 2020. Esaki ta un konsekuensia di e asunshonnan di migrashon adaptá, di manera ku ta premirá un subida mas leve di e kantidat di grandinan riba e isla.

Suposishon di nasementu

E kantidat di nasementu na Hulanda Karibense tabata na 2020, 33 mas ku a premirá den e pronóstiko. Pa e motibu ei tambe finalmente a ahustá e espektativanan di e kantidat di yu pa kada hende muhé na Hulanda Karibense pa riba. Pa Boneiru i Sint Eustatius ta premirá pa término mas largu un kantidat mas grandi di habitante di alrededor di 30 aña ku den e pronóstiko anterior, ku konsekuensia tambe un kantidat di nasementu mas haltu. Esaki ta bin pa motibu ku e patronchinan di edat di migrantenan a kambia último añanan, loke ku a inkluí den e pronóstiko nobo.

E kantidat di habitante di Hulanda Karibense a krese den e periodo di promé di yanüari 2011 te promé di yanüari 2021, di 21 mil pa 27 mil. Esaki ta enserá un kresementu di alrededor di dos porshento i mei pa aña. Den 2030 e pronóstiko ta premirá un kantidat di 31 mil habitante, un kresementu di poblashon di 1,6 porshento pa aña. Den e pronóstiko alrededor di aña 2050 e kresementu ta para. Hulanda Karibense e tempu ei lo tin kasi 34 mil habitante segun espektativa.

Di e tres islanan e kantidat di habitante di Boneiru a krese mas duru for di 2011. E pronóstiko tambe ta premirá pa Boneiru un kresementu mas fuerte: di 22 mil na komienso di 2021 pa 27 mil den 2030 i 28 mil den 2050. Sint Eustatius ta krese segun espektativa di 3,1 mil habitante na komienso di 2021 pa 3,7 mil den 2050. Pa Saba ta spera un kresementu di 1,9 mil pa 2,3 mil habitante.
E pronóstiko anterior tabata premirá pa Boneiru den 2050 un kantidat di habitante ku tabata mas òf ménos 700 mas tantu ku segun e pronóstiko nobo. Pa Sint Eustatius, e kantidat di habitante den e pronóstiko anterior tabata mas òf ménos 200 habitante mas, pa Saba 100 mas.

E proporshon di habitante di Hulanda Karibense ku a nase na Hulanda Karibense, òf riba un di e islanan Aruba, Kòrsou òf Sint Maarten, ta keda segun espektativa te 2030 riba e nivel aktual di 56 porshento. Mas òf ménos 14 porshento di e habitantenan a nase na Hulanda Oropeo i 30 porshento otro kaminda. Esei ta keda e kaso tambe segun espektativa te 2030. Den e añanan ku ta sigui e proporshon di habitantenan ku a nase na eks Antia Hulandes òf Hulanda Oropeo ta baha un tiki segun e pronóstiko i e proporshon ku a nase na otro kaminda ta subi ku 3 punto di porshento. Den e pronóstiko di 2020 e proporshon di hulandesnan oropeo tabata den 2030 mas òf ménos 2 punto di porshento mas haltu i e proporshon di habitantenan nasé otro kaminda tabata 2 punto di porshento mas abou ku den e pronóstiko nobo.

Hulanda Karibense ta envehesé. Na komienso di 2021, 13 porshento di e poblashon di Hulanda Karibense tabatin 65 aña òf mas. E proporshon di e grupo aki ta bai subi segun e pronóstiko. Pa 2030 ta premirá ku 19 porshento di e poblashon ta konsistí di personanan di 65 aña i mas, pa 2050 28 porshento. Komo ku segun e pronóstiko nobo un proporshon mas grandi di imigrante for di Hulanda Oropeo lo bolbe bai bèk, e proporshon di grandinan den e pronóstiko nobo ta subi ménos fuerte ku den esun anterior. E pronóstiko di 2020 tabata premirá ku 20 porshento di e poblashon lo a konsistí di personanan di 65 aña i mas i 30 porshento den 2050.