Pronóstiko alarmante: Kòrsou lo bai tin pobresa na nivel nashonal na 2023

WILLEMSTAD. For di e punto di bista aki, ta komprendibel ku e presunto falta di toma di desishon desisivo di parti di gobièrnu i ehekushon di maneho firme ta kondusí na frustrashon i desepshon bou di gruponan den nos komunidat.
Kosnan ku ántes tabata lógiko i evidente, no ta lógiko i evidente mas. Esei ta loke e krísis di COVID-19 a siña nos. E lès duru aki ta eksigí un reflekshon krítiko riba maneho i práktika gubernamental, práktika di interlokutornan sosial i tambe di siudadanonan.” Kòrsou ta un pais bunita ku un potensial grandi. Ta nos deber di saka mas probecho ku ta posibel di e potensial aki. Esaki ta nos deber i kompromiso na futuro generashonnan. E palabranan klave den e kuadro aki ta “konfiansa i “koperashon”. No un konfiansa ingenuo (ignorante) i siegu, sino un konfiansa sano i madurá, den kua nos ta rekonosé nos vulnerabilidatnan. Vulnerabel pasobra Kòrsou ta un estado insular chikí den desaroyo den un mundu kompliká ku ta evolushonando rápidamente. Tambe mester afirmá ku pa kolmo nos karakter insular, kultura i mentalidat komo pais Karibense ta trese sierto krea opstakulo spesífiko.