Promesa Teatro Nashonal ‘Ced Ride’ ta ketu riba pia !

WILLEMSTAD – Famia i amigunan i representantenan di gobièrnu awe a rekordá e fecha di nasementu i alabes 1 aña di fayesimentu di Ced Ride.
Tabatin un seremonia i programa ofisial na graf di Ced Ride, na Santana di Roodeweg.
A inisiá e seremonia ku Reinier Lijfrock ku a kanta Nos Tata, sigí pa ponementu di flor di esposa di Ced Ride, Mary Bikker.
Tabatin tambe orashon di Pastor Raul i amigunan di Ced Ride ku a deklama poesia.
Durante di su orashon Pastor Raul a bisa entre otro ku Ced Ride tabata un lus i ku e ta sigi ta lus pa nos i pa mundu. Tambe pastor Raul a menshona e importansia i balor ku Ced Ride a duna na Papiamentu. Pastor Raul a ekspresa e deseo ku generashonnan nobo ta kontinua ku e arte di Ced Ride.
Minister Sithree van Heydoorn, durante a bisa na graf di Ced Ride, ku di parti di gobièrnu, lo no laga loke ku Ced Ride a laga atras muri.
Prueba di esaki ta ku durante di selebrashon di Dia di Bandera e aña aki, a inkluí kansionnan di Ced Ride, tantu den den dia komo anochi.
Mas aleu e minister a bisa ku e promesa ku ela hasi tokante un teatro nashonal- e dia ei ela anunsiá ku e lo e yama Teatro Ced Ride-, e ta trahando duru riba dje. Van Heydoorn a referi na kritikanan ku a surgi, ku ela tuma un desishon unilateralmente. ‘’Pero mi ta karga kune’’, asina e minister a bisa.

(Foto kortesia di Zahir Gijsbertha)