Promé di september ke start operashon di fasilidatnan petrolero di Kòrsou

WILLEMSTAD. For di 53 kompanianan ku a mustra interes pa manehá i operá nos fasilidatnan petrolero, e komishon a hasi un selekshon di kompanianan ku por a kontinuá den e proseso pa yega na un partner.
E kompanianan ku a keda selektá por a hasi nan evaluashon preliminar, dor di entre otro hasi uso di informashonnan inkluí den e dokumentu inisial ‘Teaser’ ku nan a risibí huntu ku un pakete di informashon tokante di e fasilidatnan.
E kompanianan a haña akseso tambe na e data-room virtual di RdK kaminda nan por a optené informashon i datonan adishonal tokante di nos fasilidatnan petrolero.
Durante varios siman a tuma lugá bishitanan di representantenan di kompanianan na nos refineria i terminal na Bullenbaai ya asina nan por hasi nan asina yama “Due Dilligence.” Durante di e bishitanan aki, Gerensha di Refineria i e komishon enkargá ku e búskeda pa un operadó pa nos fasilidatnan petrolero tambe a tene presentashon tokante di entre otro operashon i mantenshon di e refineria, rekurso humano, komersio, finansas i tokante regulashon di medio ambiente.
Na fin di Febrüari último, RdK a hala e fecha pa entregá un proposishon final i fiho pa fin di Mart.
RdK a hasi esaki riba petishon di algun di e kompanianan ku tabata hasi nan estudionan pa por a entregá nan proposishon. No menos ku 3 kompania a entregá nan oferta definitivo pa maneho i operashon di nos fasilidatnan petrolero ora nan a entregá nan asina yamá ‘Binding Proposal’ na RdK.
E tim di RdK, ku ta enkargá ku e búskeda i selekshon di un partner stratégiko pa nos fasilidatnan petrolero a sigui rápidamente ku e trabounan pa evaluá e ofertanan ku a drenta pa direktamente despues presentá e resultado di e evaluashon na Direktor di RdK, Hunta di Komisario i Akshonista di RdK.
Siman pasa a risibi tur aprobashon formal pa selektá Caribbean Petroleum Refinery komo e prefered bidder i pa siguí ku e fase di negosashon.
Negosashon
For di e siman aki e tim negoshadó di Gobièrnu i RdK lo bai mesa ku Caribbean Petroleum Refinery pa negoshá. Akuerdonan, asina yama “Ancillary Agreement”, ta keda negoshá i sera separadamente ku Curoil, Aqualectra, KTK i Selikor.
E meta stipulá ta keda pa yega na un akuerdo no mas tardá ku promé di Sèptèmber proksimo pa mesora despues kuminsa start operashon di e fasilidatnan petrolero di Kòrsou.