Prínsipe heredero di Arabia Saudita a haña inmunidat pa e kaso di asesinato di Khashoggi

WASHINGTON – Ayera e atministrashon di Biden a determiná ku lo no bai persigi hudisialmente prínsipe heredero di Arabia Saudita.
Esaki ta nifiká ku lo bai dune inmunidat total den e kaso di asesinato di periodista Jamal Khashoggi.
Den e kaso aki poder ta surpasá hustisia ya ku segun investigashon di Servisio di Inteligensia merikano Mohamed bin Salman a ordená pa laga likidá Jamal Khashoggi periodista Árabe/Merikano ku tabata traha pa “The Washington Post” i vários otro medionan di komunikashon.
The Washington Post mes a publiká un artíkulo awe ku atministrashon di Biden a bai na rudia pa pordoná prínsipe heredero Mohamed bin Salman teniendo prueba di CIA ku ela laga asesiná Jamal Khashoggi.
Hatice Cengiz kasa di Jamal Khashoggi den un entrevista a bisa ku e biaha aki ta presidente Joe Biden a tira su kasa mata simplemente debí ku su atministrashon ta tras di petrolio.
Jamal Khashoggi tabata skirbi kolumna pa “The Washington Post” i otro medionan di komunikashon ku tabata krítika prínsipe heredero Mohamed bin Salman.
Esaki a kondusí ku na luna di òktober di aña 2018 na momentu ku Jamal Khashoggi a bai embahada di Arabia Saudita na Turkia pa regla su dokumentashon agentenan di seguridat Árabe a sekuestre i despues likid’é.
Fred Ryan editor i direktor general di The Washington Post a kalifiká lokual atministrashon di Biden a hasi aworakí komo un akto “bergonsoso”.