Prestashon di hotèl di Kòrsou na jüli….. Desde COVID-19, prestashon di hotèl nunka tabata asina haltu

Willemstad – CHATA ta publiká prestashon di hotèl pa luna di jüli ku un okupashon nunka bisto desde ku COVID-19 a asotá nos isla i mundu henter.
Luna di jüli a asta mustra un okupashon un tiki mas haltu kompará ku e mesun luna na 2019 (+6.1%). E otro parameternan, siendo e Tarifa Promedio Diario i e Entrada pa Kamber Disponibel, tambe ta mustra sifranan positivo kompará ku luna di jüli na 2019.
Porfin un rekuperashon fuerte despues di e promé seis lunanan malu di e aña aki.

E temporada di fakansi ta hunga un ròl, e sifranan haltu di bakunashon riba nos isla i e situashon di COVID riba nos isla, tur ta kriterianan importante pa un turista disidí pa biaha pa nos bunita isla.
Pa luna di ougustùs bookingnan ta mustra bon, pero no mesun fuerte ku luna di jüli. Pesei CHATA ta koutelosamente positivo pa e último mitar di 2021.
Ta importante pa tene e situashon di infekshon bou di kontròl, ya ku Kòrsou mester keda riba kódiko hel pa Hulanda i pa sigurá ku CDC ta pone Kòrsou bèk riba un nivel di riesgo abou, aunke esaki no a paresé di afekta bishitantenan Merikano den pasado.

Si nos kompará nos prestashon di hotèl ku islanan den Karibe, nos ta mira un okupashon di Karibe di 53.6% (18.1% menos ku Kòrsou). Kompará ku 2020 (+19.5%) esaki ta un oumento signifikante, sinembargo, kompará ku 2019 promé ku COVID, esaki ta un bahada di mas ku 17%.
Aki nos ta presentá un bista di e tres indikadónan prinsipal di prestashon di hotèl di Kòrsou pa luna di jüli kompará ku 2020 i 2019.

Den jüli di 2021 Kòrsou tabatin un okupashon di hotèl di 71.7%. Kompará ku 2020 (33.2%) esaki ta un oumento signifikante di 116.3%. Mas aún, si nos wak e sifra di okupashon promé ku COVID (jüli 2019) esaki tambe ta un oumento di 6.1%.
E tarifa promedio diario tambe a oumentá ku 10.8% kompará ku 2020 pa $159.28. Kompará ku jüli 2019, esaki tambe ta un oumento di 9.1%.
Pa loke ta trata e entrada a kamber disponibel, sifra ta indiká un oumento signifikante di 139.5% kompará ku 2020. Di $47.68 na 2020 pa $114.19 na 2021. Asta kompará ku sifranan promé ku COVID, e entrada pa kamber disponibel a oumentá ku 15.8%.

Rekuperashon sostenibel lo tuma tempu
Lo mas impreshonante den e sifranan di prestashon di hotèl di jüli, ta ku e rekuperashon despues di e di dos lockdown na mart/aprel tabata muchu mas fuerte i lihé ku esun na 2020 kual a tuma varios luna pa yega bèk na sifranan desente sinembargo no impreshonante. Korsou a mustra ku rekuperashon ta posibel i nos mester traha duru pa mantené e sifranan fuerte aki di rekuperashon. Tur esaki ta depende di e infekshonnan di COVID riba nos isla, tene Korsou riba lista di paisnan di riesgo abou pa nos merkadonan prinsipal i logra un kobertura di bakunashon mas haltu posibel. E rekuperashon despues di COVID pa Kòrsou, meskos ku hopi otro pais, lo tuma tempu.

Sin lugar a duda, e sektor di turismo di Kòrsou a mustra su abilidat pa rekuperá lihé.
Un prolongashon di e sosten finansiero (TVL i NOW) pa e último mitar di 2021 ta urgentemente nesesario pa sostené e rekuperashon akí. E perdidanan enorme di 2020 i e promé seis lunanan di 2021 no ta fasil pa rekuperá di dje, apesar ku afortunadamentu turistanan a skohe pa bolbe bishitá nos isla masalmente. CHATA ta kere ku tur partner den turismo i hospitalidat mster traha huntu i ku sosten di gobièrnu pa loke ta trata e último fase di e programa di sosten finansiero, nos por rekuperá nos ekonomia.