Presidente Rajapaksa di Sri Lanka a renunsia finalmente for di Singapur

KUALA LUMPUR – Míles di manifestante na Sri Lanka a invadí Palasio Presidensial, residensianan i ofisinanan di gobièrnu na Colombo.
Tabatin konfrontashon entre militarnan i manifestantenan ku tabata eksigí pa presidente Rajapaksa renunsia di su kargo komo presidente di Sri Lanka.
Resultado di e konfrontashon aki a pone ku un total di 286 manifestante a keda detené, 87 a resultá herida i un persona a muri durante e protestanan di kasi 5 dia pa presidente Rajapaksa renunsia.
Ayera den oranan lat di anochi presidente Rajapaksa a anunsiá su retiru for di Singapur kaminda ela logra hui den avion presidensial ku ta pertenesé na estado di Sri Lanka.
Un di e motibunan dikon presidente Rajapaksa a hañe den e problema serio aki ku e mester a entregá su retiru ta debí ku su ministernan tabata metí na korupshon i malversashon di fondonan públiko.
Esaki a kondusí ku na momento ku pandemia di Covid-19 i lokual ta pasando entre Ukrania i Rusia a dal aden huntu ku e krísis ekonómiko na nivel global su problema a bira inkontrolabel.
Tin skarsedat di kombustibel, komersio ta kompletamente paralisá i diariamente koriente ta kai afo ku ta un káos total na Sri Lanka.