Presidente di Petrobras a entrega su karta di retiru despues di krítika di Bolsonaro

BRAZILIA – José Mauro Coelho presidente di e empresa brasileño Petrobras a renunsia ayera di su kargo despues ku presidente Jair Bolsonaro a tene un rueda di prensa pa kritiké di su mal maneho.
Jair Bolsonaro a yama José Mauro Coelho inkompetente debí ku ela hiba un mal maneho den Petrobras ku awor mester oumentá preis di kombustibel. José Mauro Coelho a manda un mensahe bek den direkshon di Jair Bolsonaro indikando ku e mes bai manehá Petrobras pa wak si elo por hasié mihó.
Ta p’esei José Mauro Coelho tambe a bai prensa pa informá ku entrante ayera elo no ta presidente mas di Petrobras.
E oumento di kombustibel na Brazil a pone ku e pueblo Brasileño no tin ningun tipo di konfiansa den maneho di Jair Bolsonaro i ku elo por bien lubidá di bai buska un reelekshon pa sigi komo presidente di Brazil.

Den e kaso aki José Mauro Coelho a informá asamblea di Brazil ku elo entrega su retiru komo presidente di Petrobras i nan a aseptá esaki tambe.
José Mauro Coelho ta bira e di tres presidente di Petrobras bou di gobernashon di Jair Bolsonaro ku a entrega retiru.