Presidente di partido TPK ke sa: “Dikon for di 2017 RdK no a entrega su kuentanan anual?

WILLEMSTAD.- Presidente di partido Trabou Pa Kòrsou, ing. Renny Leito MBA, a manda un karta pa presidente di Parlamento indikando su preokupashon pa ku Refineria di Kòrsou (RDK).
Resientemente Gobièrnu a manda e “Financieel Management Rapportage” (FMR) di mart 2021 pa Parlamento. Analisando e FMR aki nan a detektá ku ainda tin algun entidat di Gobièrnu ku no a entrega nan kuentanan anual.
Loke a resaltá i krea preokupashon ta ku ainda RDK no a entrega su kuentanan anual for di 2017. RDK ta konosí komo un dje NV di Gobièrnu ku tin mas fondo, ta kardinal den e kadena energétiko i durante último aña nan tabata tin hopi interogante rondó dje maneho.
Nos tur por kòrda e polémikanan rondó di kita MDPT pone PMO, pone direktor kita direktor, kita Guandon Zengron pone Klesch. Lamentablemente for di 2017 no a responsabilisá kon a gasta pueblo su sèn. E presidente di partido TPK ke sa kiko tin di skonde i ta parse ku transparensia no ta konta pa RDK.
Pa Leito ta hopi alarmante ku sèn di pueblo ta wòrdu gasta sin Parlamento no tin niun bista riba esaki. Den kuadro di esaki Leito a proponé na Parlamento pa hasi e ministernan konserní minimal e siguiente preguntanan:
1) Kiko te motibunan ku for di 2017, Refineria di Kòrsou, no a entrega su kuentanan anual?
2) Lei di bon gobernashon ta permití keda sin entrega kuentanan anual asina largu?
3) Ken ta responsabel pa keda sin entrega e kuentanan anual aki?
Maske ku partido Trabou Pa Kòrsou no ta representá den e aktual Parlamento dje forma aki nos tòg ta keda vigilá gobernashon i duna sosten kaminda mester.
Partido Trabou Pa Kòrsou ta boga pa trese alivio pura pa nos pueblo. Kada un sèn mester bai pa aliviá e situashon pésimo ku pueblo ta pasando aden.