Presidente di FFK Sr. Ramiro Griffith: “Mi no a yega paso Mama tabatin sèn”… Ramiro mester a soportá insulto na “Vesta”…

Deporte 5 Star a kombersá awe mainta ampliamente ku Sr. Ramiro Griffith ku ta presidente di FFK.
Sr. Ramiro Griffith a rekonosé ku den fin di siman na stadion di Vesta tabatin algun kos ferfelu i hasta e la wòrdu insultá.

E ta bisa ku e ta bai tur tereno pa mira futbòl, i si mester duna “feedback” e ta hasi esei pa yuda e totalidat.

Ramiro ta rekonosé ku tabatin kosnan poko ferfelu, i e la trata di “papia” i intermediá.

Lamentablemente e presidente mester a skucha gritunan ferfelu tildando su persona di ta defendé tim ku plaka, loke no ta bèrdat.

Tambe nan a yama nos presidente “Payaso”.

Ramiro a kombersá hasta ku un mayor ku a insultá su Mama ora e kier a plakia un situashon ku tabata tilda di sali for di man.

E ta bisa ku C-Stars no ta tim ku plaka, sino tim ku a lanta di muchanan humilde di Koral Specht, Dominguito i tambe Buena Vista.

Pa e hóben presidente di FFK futbòl tin di sirbi pa e mucha bai dilanti den bida i haña formashon, i ku na mucha ganamentu no ta e kos di mas importante.

“Mi ta kere den traha huntu.

Mi no ta kere den “heilig huisje”.

Mi lo duna “feedback” pa e bienestar dje deporte”, e dirigente ta remarka. Ramiro Griffith ta bisa ku e no a lanta komo un mucha ku plaka.

I ku su Mama tabata un muhé soltero ku mester a traha i lucha.

“Ma yega kaminda kumi ta, paso ma studia, m’a traha duru i hunga futbòl profeshonal ku a yudami paga mi estudio”, e máksimo dirigente di nos futbòl ta splika.
Ramiro lo ta den “Cuando Yo, Era Yo” djarason awor mainta den Deporte Hoyer.