Presidente di Argentina a pidi Merka pa kita embargo kontra Venezuela i Cuba

BUENOS AIRES – Alberto Fernández presidente di Argentina a hasi un petishon ekstraordinario ayera na presidente Joe Biden pa por fabor kita e embargonan ku tin kontra Venezuela i Cuba. Mester indika ku Alberto Fernández ta presidente di CELAC (Comunidad de Estados Latinoamericanos y el Caribe).
E motibu dikon Alberto Fernández a hasi e petishon aki ta debí ku Venezuela ta un di e paisnan mas importante den Amérika Latina ku por produsí i suministrá sufisiente petrolio i gasnatural pa baha kosto di bida den e paisnan Latino.
Fuera di esaki Venezuela tin sufisiente materia prima i alimento ku por eksportá pa paisnan den Amerika Latina i Caribe ku no tin sufisiente rekurso.
Alberto Fernández a splika ku Cuba tambe ta hopi importante pa Amerika Latina i Caribe di kual tin ekspertonan den medisina.
Cuba por eksportá bakuna, suku i tabako ku asina nan tambe tin un pilar ekonómiko pa e pais por sigi desaroyá.
Aktualmente Cuba por ehempel a desaroyá 5 bakuna ku no por keda eksportá debí ku Merka tin embargo kontra e régimen di Diaz Canel.
Alberto Fernández a splika ku si e atministrashon di Biden mester kita e embargonan aki kontra Cuba i Venezuela hopi di e paisnan miembro di CELAC lo keda benefisiá.