Presentashon di kargo kriminal kontra Theo Heyliger pa soborno

PHILIPSBURG—Un konsultador ulandes di inisial R.M. (64) lo tin di presentá den korte di hustisia na Sint Maarten riba kargo di a paga soborno na un parlamentario i e lider politiko ku mas voto na Sint Maarten, Theo Heyliger. E soborno lo a tuma lugá entre ougustus di 2011 i september di 2011. Di akuerdo ku e dagfar ku Ministerio Publiko a manda pa Theo Heyliger, e profeshonal ulandes lo a paga Heyliger US $300,000 pa kompra di tereno pa konvensé Heyliger pa duna un kompania partikular trabou di limpiesa den haf di Sint Maarten. E ulandes a paga parti dje suma via su firma di konsulta i parti via Advanced Consultech SA pa Devcon TCI Ltd. i Volker Construction International BV/Volker Stevin Caribbean NV haña e trabou. Ministerio Publiko ta tene Heyliger responsabel pe hecho ku ela tuma 300 mil dòler sabiendo ku esei a sosodé pa konvensé pa regla e kontrat. Esei ta nifiká ku OM por akusá Heyliger komo kómplise den e kaso. Mester bisa si ku ta trata di un intento di soborno na Heyliger pero OM ta kere ku nan tin prueba ku kompanianan manera Ballast Nedam International BV, Devcon, Windward Roads i Volker Construction/Volker Stevin a paga diferente amtenar pa nan regla kontrat pa nan. Segun OM, e pagonan a tuma lugá na èks Antia, Ulanda, Isle of Man, Panama i St. Kitts.